ប្រធានាធិបតីរុស្ស៊ី លោក វ្ល៉ាឌីមៀ ពូទីន បានថ្លែងកាលពីថ្ងៃអង្គារថា ប្រទេសរុស្ស៊ី និងចិនមានកំណត់ត្រាដ៏អស្ចារ្យមួយក្នុងការធ្វើការរួមគ្នានៅលើពិភពលោក។ លោកបានធ្វើការអត្ថាធិប្បាយបែបនេះក្នុងនៅក្នុងជំនួបពិភាក្សាជាមួយរដ្ឋមន្ត្រីការបរទេសចិន លោក Wang Yi នៅវិមានក្រឹមឡាំង។
លោកពូទីនបាននិយាយថា “យើងចង់បង្ហាញពីការពេញចិត្តចំពោះវិធីដែលទំនាក់ទំនងរបស់ប្រទេសទាំងពីរកំពុងអភិវឌ្ឍ រួមទាំងការគាំទ្រដោយផ្ទាល់ពីក្រសួងការបរទេសរៀងៗខ្លួនផងដែរ”។
លោក ពូទីន បានបន្ថែមថា លោកនឹងជួបជាមួយប្រធានាធិបតីចិន ស៊ី ជីនពីង ក្នុងអំឡុងពេលប្រារព្ធពិធីជ័យជំនះក្នុងសង្គ្រាមលោកលើកទី២ នៅទីក្រុងមូស្គូ នៅថ្ងៃទី៩ ខែឧសភា ឆ្នាំ២០២៥ នេះ ហើយយើងនិងពិភាក្សាបញ្ហាធំៗនៅលើពិភពលោក និងបង្ហាញកិច្ចសហប្រតិបត្តិការកាន់តែរឹងមាំ។
លោកពូទីនបានបញ្ជាក់បន្ថែមថា “យើងនឹងមានឱកាសពិភាក្សាអំពីស្ថានភាពបច្ចុប្បន្ននៃទំនាក់ទំនងទ្វេភាគី និងអន្តរកម្មរបស់យើងនៅលើទីលានអន្តរជាតិ ជាចម្បង អង្គការសហប្រជាជាតិ ក្រុមប្រឹក្សាសន្តិសុខអង្គការសហប្រជាជាតិ ក៏ដូចជាអង្គការសហប្រតិបត្តិការសៀងហៃ BRICS និងវេទិកាមួយចំនួនផ្សេងទៀតដែលយើងធ្វើការរួមគ្នាដោយជោគជ័យដ៏អស្ចារ្យ”នាពេលកន្លងទៅ។
លោក Wang ក៏បានសង្កត់ធ្ងន់ដែរថាទំនាក់ទំនងទ្វេភាគីគឺផ្អែកលើ “ការជឿទុកចិត្តគ្នាទៅវិញទៅមក” ហើយថាប្រទេសទាំងពីរនឹងបន្ត ការពារផលប្រយោជន៍រួមរបស់ភាគីទាំងពីរក្នុងកិច្ចការអន្តរជាតិ និងតំបន់ និងឲ្យកាន់តែរឹងមាំនិងជឿទុកចិត្ត។
លោក Wang បានលើកទ្បើងថា កិច្ចសហប្រតិបត្តិការចិន-រុស្ស៊ី គឺមិនដែលមានទិសដៅប្រឆាំងនឹងភាគីទីបីណាមួយឡើយ ហើយវាមិនដែលមានការជ្រៀតជ្រែកពីខាងក្រៅឡើយ។
គួររំលឹកថា ក្រៅពីជំនួបពិភាក្សាជាមួយលោក ពូ ទីន លោក Wang ក៏មានជំនួបដាច់ដោយឡែកមួយជាមួយរដ្ឋមន្ត្រីការបរទេសរុស្ស៊ី លោក Sergey Lavrov កាលពីថ្ងៃអង្គារម្សិលមិញផងដែរ។ ក្រសួងការបរទេសរុស្ស៊ីបាននិយាយនៅលើគេហទំព័ររបស់ខ្លួនថា “ភាគីទាំងពីរបានផ្លាស់ប្តូរយោបល់អំពីលទ្ធភាពនៃការដោះស្រាយវិបត្តិអ៊ុយក្រែន។ ពួកគេបានសង្កត់ធ្ងន់លើតម្រូវការក្នុងការបន្សាបឫសគល់នៃជម្លោះ។
ទីក្រុងប៉េកាំងមិនគ្រាន់តែបានប្រកាសមិនស្តីបន្ទោសរុស្ស៊ីចំពោះជម្លោះអ៊ុយក្រែន ប៉ុណ្ណោះទេ តែថែមទាំងបានថ្កោលទោសទណ្ឌកម្មរបស់លោកខាងលិចដែលបានដាក់លើទីក្រុងម៉ូស្គូថែមទៀត។ ប្រទេសចិនបានចោទប្រកាន់សហរដ្ឋអាមេរិកថាបានប្រកាន់ខ្ជាប់នូវចិត្តគំនិតសង្គ្រាមត្រជាក់ដែលហួសសម័យ ដែលផ្អែកលើការប្រឈមមុខដាក់គ្នាដែលនយោបាយបែបនេះវាផ្ទុយពីផលប្រយោជន៍សកល៕
ដោយ៖ ពេជ្រ
