ក្រុមជម្រើសជាតិឥណ្ឌូណេស៊ី នៅតែបន្តក្ដីសង្ឃឹមដណ្តើមកៅអីពានរង្វាន់ World Cup 2026 ដដែល បន្ទាប់ពីប្រកួតឈ្នះបារ៉ែន ក្នុងលទ្ធផល ១-០ ក្នុងវគ្គជម្រុះតំបន់អាស៊ី ខណៈពួកគេនៅសល់២ប្រកួតទៀត ប៉ះចិននិងជប៉ុន។
វាគឺជាជ័យជម្នះលើកដំបូងរបស់គ្រូបង្វឹកលោក Patrick Kluivert បន្ទាប់ពីអតីតកីឡាករជម្រើសជាតិហូឡង់រូបនេះបានចាញ់ការប្រកួតបើកឆាករបស់ខ្លួនក្នុងលទ្ធផល ៥-១ ក្រោមថ្វីជើងក្រុមអូស្ត្រាលីកាលពីថ្ងៃព្រហស្បតិ៍សប្តាហ៍មុន។
យ៉ាងណាមិញឆ្លងកាត់៨ប្រកួតក្នុងពូល C ឥណ្ឌូណេស៊ី ឈ្នះ២ ចាញ់៣ និងស្មើ៣ ឈរលេខ៤មាន៩ពិន្ទុ តាមពីក្រោយលេខ២ អូស្រ្តាលី ៤ ពិន្ទុនិងក្រុមលេខ៣ អារ៉ាប់ប៊ី ១ពិន្ទុ។ ដូច្នេះបើឥណ្ឌូណេស៊ី យកឈ្នះប្រកួត២ដែលនៅសល់ជាមួយចិននិងជប៉ុន នោះ ពួកគេមានសង្ឃឹមកក្នុងការដណ្តើមកៅអីទៅ World Cup ជាលើកដំបូងរបស់ពួកគេផងដែរ៕
