ថ្លែងមុនការប្រកួតជាមួយក្រុមម្ចាស់ផ្ទះវៀតណាម ខ្សែប្រយុទ្ធក្លិបបាល់ទាត់ភ្នំពេញក្រោន Andres Nieto បាននិយាយថា «ការប្រកួតនេះនឹងក្លាយជាការប្រកួតដ៏តានតឹង និងមានការប៉ះទង្គិចគ្នាច្រើន។ ខ្ញុំគិតថាវានឹងក្លាយជាការប្រកួតដ៏លំបាកបំផុតមួយ ព្រោះពួកយើងលេងនៅទឹកដីរបស់ពួកគេ។
ខ្សែប្រយុទ្ធចូលសញ្ជាតិរូបនេះបានបន្តថា ក្រុមជម្រើសជាតិរបស់យើងកំពុងត្រៀមខ្លួនសម្រាប់ការប្រកួតបែបនេះ។ យើងកំពុងខិតខំប្រឹងប្រែងដើម្បីឲ្យមានការប្រកួតប្រជែងដ៏ល្អមួយ។ ខ្ញុំមិនអាចនិយាយអំពីលទ្ធផលបានទេ ព្រោះអាចនឹងមានរឿងជាច្រើនកើតឡើង ប៉ុន្តែអ្វីដែលខ្ញុំអាចសន្យាបាននោះគឺយើងនឹងប្រឹងប្រែងឲ្យអស់ពីសមត្ថភាពដើម្បីនាំកម្ពុជាឱ្យស្ថិតនៅកម្រិតខ្ពស់មួយកម្រិតទៀត។»។
សូមជម្រាបថា ក្រុមគោព្រៃកម្ពុជា នឹងត្រូវប៉ះក្រុមម្ចាស់ផ្ទះវៀតណាម ក្នុងជំនួបមិត្តភាពអន្តរជាតិដកស្រង់បច្ចេកទេស នៅវេលាម៉ោង៧:៣០នាទីយប់នេះ នាកីឡដ្ឋាន Gò Đậu, ខេត្ត Binh Duong នៃប្រទេសវៀតណាម ៕
