ប្រធានាធិបតីអ៊ុយក្រែន លោក Volodymyr Zelenskyy ថ្លែងថា ជំនួបជាមួយបេសកជនអាមេរិកបានធ្វើឲ្យគាត់មានក្តីសង្ឃឹមទ្បើងវិញនៅក្នុងកិច្ចខិតខំប្រឹងប្រែងជាក់ស្តែងមួយ ដើម្បីកែប្រែទំនាក់ទំនងរវាងអាមេរិក និងអ៊ុយក្រែន ចំពេលមានជម្លោះជាមួយប្រធានាធិបតីអាមេរិក Donald Trump ។
លោក Zelenskyy បានជួបពិភាក្សាជាមួយបេសកជនពិសេសរបស់សហរដ្ឋអាមេរិកសម្រាប់អ៊ុយក្រែនលោក Keith Kellogg កាលពីថ្ងៃព្រហស្បតិ៍កន្លងទៅ។ ប៉ុន្តែសន្និសីទសារព័ត៌មានរួមដែលគ្រោងធ្វើបន្ទាប់ពីការប្រជុំរបស់ពួកគេត្រូវបានលុបចោល។
ក្រោយមកលោក Zelenskyy បាននិយាយនៅក្នុងសុន្ទរកថាទៅកាន់ប្រជាជនថាវាជាការប្រជុំដែលស្តារក្តីសង្ឃឹមរបស់លោកឡើងវិញ។ គាត់ក៏បាននិយាយផងដែរថា “យើងត្រូវការកិច្ចព្រមព្រៀងរឹងមាំជាមួយសហរដ្ឋអាមេរិក – កិច្ចព្រមព្រៀងដែលនឹងដំណើរការយ៉ាងពិតប្រាកដ” ។
លោក Zelenskyy បានពន្យល់ថា កិច្ចប្រជុំរួមមានការពិភាក្សាអំពីស្ថានភាពនៅជួរមុខ តម្រូវការដោះលែងអ្នកទោសទាំងអស់ពីប្រទេសរុស្ស៊ី និងភាពចាំបាច់នៃប្រព័ន្ធធានាសន្តិសុខដែលអាចទុកចិត្តបាន និងច្បាស់លាស់ ដែលធានាថាសង្រ្គាមនឹងមិនវិលត្រឡប់មកវិញឡើយ។
លោក Trump និង Zelenskyy បានប្រឈមមុខដាក់គ្នានៅពេលដែលអាមេរិកចាប់ផ្តើមកិច្ចចរចាបទឈប់បាញ់ជាមួយរុស្ស៊ីដោយមិនរាប់បញ្ចូលអ៊ុយក្រែន។ លោក Trump បានហៅលោក Zelenskyy ថាជា “ជនផ្តាច់ការ” សម្រាប់ការមិនរៀបចំការបោះឆ្នោតក្នុងអំឡុងពេលសង្រ្គាម៕
ដោយ៖ ពេជ្រ
