ប្រធានាធិបតីអាមេរិកលោក Donald Trump បានថ្លែងទៅកាន់អ្នកសារព័ត៌មានជាច្រើនម៉ោងបន្ទាប់ពីកិច្ចពិភាក្សាដ៏គួរឲ្យភ្ញាក់ផ្អើលរវាងសហរដ្ឋអាមេរិក និងរុស្ស៊ី ស្តីពីវិធីបញ្ចប់ជម្លោះអ៊ុយក្រែន ខណដែលកិច្ចប្រជុំនោះបានបញ្ចប់ក្នុងទីក្រុង Riyadh កាលពីថ្ងៃអង្គារ។ លោកថ្លែងថា លោកនៅតែមានសុទិដ្ឋិនិយមចំពោះការសម្របសម្រួលកិច្ចព្រមព្រៀងសន្តិភាព។ ទន្ទឹមនោះលោកក៏បានរិះគន់មេដឹកនាំអ៊ុយក្រែនលោក Vladimir Zelensky ផងដែរ។
លោក Trump បានលើកទ្បើងថា លោកមានទំនុកចិត្តកាន់តែច្រើន អំពីអនាគតនៃសន្តិភាពយូរអង្វែង ហើយបានរំលឹកឡើងវិញថា គោលដៅភ្លាមៗរបស់គាត់គឺ ជួយសង្គ្រោះជីវិតមនុស្ស។
លោក Trump បានបន្តថា ប្រទេសណាតូ និងទីក្រុងគៀវ ត្រូវតែធ្វើឱ្យប្រាកដថា ជំនួយដែលផ្តល់ដល់អ៊ុយក្រែន មិនត្រូវបានខ្ជះខ្ជាយឡើយ ហើយពួកគេត្រូវតែបង់ប្រាក់ និងរកឱ្យឃើញថា តលលុយទាំងអស់នោះទៅណាខ្លះ?។
Trump បាននិយាយដែរថា ប្រធានាធិបតីអ៊ុយក្រែន លោកZelensky បាននិយាយកាលពីសប្តាហ៍មុនថាគាត់មិនដឹងថាពាក់កណ្តាលនៃប្រាក់ដែលយើងផ្តល់ឱ្យគាត់នៅឯណានោះទេ។បើអញ្ចឹងតើវាទៅណា? ខ្ញុំមិនដែលឃើញគណនេយ្យនោះទេ!។
ការនិយាយបែបនោះរបស់លោល Trump គឺសំដៅទៅលើបទសម្ភាសន៍របស់លោក Zelensky ជាមួយ podcaster Lex Fridman កាលពីខែមុន ដែលនៅក្នុងនោះលោកបាននិយាយថា Kiev មិនបានទទួលជាងពាក់កណ្តាល នៃមូលនិធិដែលបានសន្យាដោយវ៉ាស៊ីនតោននោះទេ។
លោក Trump បានអះអាងថាលោក Zelensky និងមន្ត្រីអ៊ុយក្រែនផ្សេងទៀតមិនត្រូវបង្ហាញជំហរឬខកចិត្តអំពីការមិនត្រូវបានអញ្ជើញឱ្យចូលរួមក្នុងកិច្ចពិភាក្សានៅទីក្រុង Riyadh នោះទេ។
លោក Trump ថ្លែងថា “ថ្ងៃនេះខ្ញុំបានឮថា យើងមិនត្រូវបានអញ្ជើញឲ្យចូលរួម។ លោកថា មែនហើយ អ្នកនៅទីនោះអស់រយៈពេលបីឆ្នាំហើយ អ្នកគួរតែបញ្ចប់វា… អ្នកមិនគួរចាប់ផ្តើមវាឬបន្តវាទេ។ អ្នកអាចធ្វើកិច្ចព្រមព្រៀងបាន”។
ប្រធានាធិបតីអាមេរិកបានពណ៌នាថា លោក Zelensky ថាមិនមានប្រជាប្រិយភាពខ្លាំងនៅក្នុងប្រទេសទៀតទេ។ ដូច្នេះ Zelensky មិនមានឥទ្ធិពលក្នុងការចរចានោះទ្បើយ។ ផ្ទុយទៅវិញវារំខានដល់កិច្ចពិភាក្សា បើ Zelensky ចូលរួមកិច្ចចរចានោះ។
យ៉ាងណាក៏ដោយ លោកដា ពួកគេនៅមានពេលដែលនឹងបានកៅអីនៅតុចរចា។ ប៉ុន្តែអ្នកត្រូវហ៊ាននិយាយបានថា ប្រជាជនអ៊ុយក្រែនមិនត្រូវការបន្តសង្រ្គាមនោះទ្បើយ ហើយវាយូរពេកចាប់តាំងពីអ៊ុយក្រែនមានការបោះឆ្នោតក្រោមការដឹកនាំរបស់ Zelensky ។
យោងតាមកាសែត New York Times ការវាយតម្លៃថា ការគាំទ្រលោក Zelensky បានធ្លាក់ចុះដល់ប្រហែល 50% ដែលពីមុនមានរហូតដល់ 90% ក្នុងកំឡុងខែដំបូងនៃជម្លោះក្នុងឆ្នាំ 2022។ ទន្ទឹមនោះអាណត្តិប្រធានាធិបតីរយៈពេលប្រាំឆ្នាំរបស់ Zelensky បានផុតកំណត់នៅខែឧសភា ឆ្នាំ 2024 ទៅហើយ ហើយគាត់បានបដិសេធមិនធ្វើការបោះឆ្នោតថ្មីដោយលើកឡើងពីច្បាប់អាជ្ញាសឹក។
លោក Trump បាននិយាយថា លោកនឹងស្វាគមន៍កងកម្លាំងរក្សាសន្តិភាពរបស់សហភាពអឺរ៉ុបនៅអ៊ុយក្រែន ក្នុងករណីបទឈប់បាញ់គ្នារវាងទីក្រុងម៉ូស្គូ និងទីក្រុងគៀវ ហើយប្រសិនបើពួកគេចង់ធ្វើវា នោះគឺល្អណាស់ ហើយលោក នឹងមិនជំទាស់នឹងបញ្ហានោះទេ។ លោក Trump ក៏បានសង្កត់ធ្ងន់ថា ទាហានអាមេរិកនឹងមិនពាក់ព័ន្ធនឹងការរៀបចំរក្សាសន្តិភាពណាមួយឡើយ៕
ដោយ៖ ពេជ្រ
