ក្នុងបរិបទដែលសេដ្ឋកិច្ចសកលកំពុងប្រឈមមុខនឹងការកើនឡើងនៃភាពមិនប្រាកដប្រជា និងនិន្នាការគាំពារនិយម ការបើកពិព័រណ៍នាំចូលអន្តរជាតិចិនលើកទី៨ (CIIE) នៅទីក្រុងសៀងហៃ គឺជាការបញ្ជាក់ឱ្យឃើញថា ប្រទេសចិននៅតែជាក្បាលម៉ាស៊ីនមួយដ៏សំខាន់ ក្នុងការជំរុញពាណិជ្ជកម្មសកល ក៏ដូចជាពង្រឹងភាពជាដៃគូ និងកិច្ចសហប្រតិបត្តិការអន្តរជាតិ។
ព្រឹត្តិការណ៍នេះ មិនត្រឹមតែជាវេទិកាតាំងបង្ហាញផលិតផលទេ តែជាសាក្ខីភាពនៃការប្តេជ្ញាចិត្តឥតងាករេរបស់ប្រទេសចិន ក្នុងការចូលរួមយ៉ាងសកម្មជាមួយនឹងសហគមន៍អន្តរជាតិ ដើម្បីការលើកកម្ពស់ពហុភាគីនិយម និងធ្វើឱ្យស៊ីជម្រៅនូវការបើកចំហកម្រិតខ្ពស់របស់ចិនជាមួយនឹងពិភពលោក។
ចាប់តាំងពីបង្កើតដំបូង CIIE បានក្លាយទៅជាច្រកចូលមួយដ៏សំខាន់សម្រាប់ក្រុមហ៊ុន និងសហគ្រាសអន្តរជាតិ ដើម្បីបោះជំហានចូលទៅកាន់ទីផ្សារចិន ដែលជាផ្សារនាំចូលលំដាប់ទីពីររបស់ពិភពលោក។ ក្នុងរយៈពេលប្រាំបីឆ្នាំនេះ CIIE បានតាំងបង្ហាញផលិតផលបច្ចេកវិទ្យា និងសេវាកម្មថ្មីជាង ៣,០០០ និងបង្កើតប្រតិបត្តិការពាណិជ្ជកម្មដែលមានតម្លៃសរុបជាង ៥០០ ពាន់លានដុល្លារអាមេរិក ហើយបានសម្របសម្រួលការផ្គូរផ្គងធុរកិច្ចជាង ១,១០០។
សមិទ្ធផលទាំងនេះ បានបញ្ជាក់ថា ប្រទេសចិនមិនត្រឹមតែជារោងចក្ររបស់ពិភពលោកទេ តែក៏ជាទីផ្សារអ្នកប្រើប្រាស់ដ៏ធំជាងគេមួយ និងជាក្បាលម៉ាស៊ីនដ៏សំខាន់សម្រាប់សេដ្ឋកិច្ចសកលផងដែរ។ យោងតាមការព្យាករណ៍របស់ក្រសួងពាណិ្ជកម្មចិន ការនាំចូលទំនិញ និងសេវាកម្មរបស់ប្រទេសចិន នឹងមានទំហំលើសពី ១៥ ទ្រីលានដុល្លារអាមេរិក ក្នុងរយៈពេល ៥ ឆ្នាំខាងមុខនេះ។
ការរៀបចំ CIIE លើកទី៨ ក្រោមប្រធានបទ “យុគសម័យថ្មី អនាគតរួម” ជាមួយនឹងការចូលរួមយ៉ាងទូលំទូលាយពីអ្នកតាំងបង្ហាញផលិតផលជាង ៤០០០ មកពីប្រទេស តំបន់ និងអង្គការអន្តរជាតិចំនួន ១៥៥ នឹងនាំមកនូវកាលានុវត្តភាពថ្មីៗបន្ថែមទៀតដល់សហគ្រាសអន្តរជាតិ ដើម្បីភ្ជាប់ទំនាក់ទំនងជាមួយអ្នកប្រើប្រាស់ និងអ្នកជំនួញចិន ក៏ដូចជាជ្រៀតចូលទៅកាន់ទីផ្សារចិនផងដែរ។
អ្វីដែលគួរឱ្យកត់សម្គាល់សម្រាប់ CIIE លើកទី៨ នោះគឺការបង្កើតជាលើកដំបូងនូវទីតាំងសម្រាប់ការដាក់បង្ហាញផលិតផលមកពីក្រុមប្រទេសអភិវឌ្ឍន៍តិចតួច។ គំនិតផ្តួចផ្តើមនេះ បានបញ្ជាក់ពីការយកចិត្តទុកដាក់ខ្ពស់របស់ប្រទេសចិន ក្នុងការចែករំលែកកាលានុវត្តភាពអភិវឌ្ឍជាមួយប្រទេសអភិវឌ្ឍន៍តិចតួច ប្រកបដោយបរិយាបន្ន ដែលនឹងអនុញ្ញាតឱ្យពួកគេទទួលបានបរិយាកាសកាន់តែប្រសើរ និងអត្ថប្រយោជន៍ពីគោលនយោបាយអនុគ្រោះពន្ធសូន្យរបស់ចិន។
ថ្លែងក្នុងពិធីបើកសម្ពោធនៃ CIIE ឯកឧត្តមនាយករដ្ឋមន្ត្រីចិនបានគូសបញ្ជាក់ថា ប្រទេសចិននឹងលើកកម្ពស់ការបើកចំហរប្រកបដោយស្តង់ដារខ្ពស់ ជំរុញកំណែទម្រង់ស្ថាប័ន និងពន្លឿនការធ្វើសេរីភាវូបនីយកម្មនៃឧស្សាហកម្មសេវាកម្ម។ ការប្តេជ្ញាចិត្តទាំងនេះ មិនមែនគ្រាន់តែការនិយាយនោះទេ តែត្រូវបានគាំទ្រដោយសកម្មភាព និងលទ្ធផលជាក់ស្តែងនាពេលកន្លងមក។
តួយ៉ាង ក្នុងរយៈពេលបីត្រីមាសដំបូងនៃឆ្នាំ២០២៥ ប្រទេសចិនបានចុះបញ្ជីក្រុមហ៊ុនវិនិយោគបរទេសថ្មីជិត ៤៩,០០០ ដែលជាការកើនឡើង ១៦,២% ធៀបនឹងរយៈពេលដូចគ្នាក្នុងឆ្នាំ២០២៤។ ចាប់ពីឆ្នាំ ២០២១ ដល់ឆ្នាំ ២០២៥ ការវិនិយោគបរទេសសរុប មានទំហំលើសពី ៧០០ ពាន់លានដុល្លារអាមេរិក ដែលជាការកើនឡើងគួរឱ្យកត់សម្គាល់ទាំងទំហំ និងទំនុកចិត្តក្នុងចំណោមវិនិយោគិនសកល។ ទន្ទឹមនឹងនេះ ប្រទេសចិនបានជំរុញកិច្ចសហប្រតិបត្តិការខ្សែក្រវាត់ និងផ្លូវ ប្រកបដោយគុណភាពខ្ពស់ជាមួយប្រទេសជាង ១៥០ ប្រទេស និងបានកាត់បន្ថយអត្រាពន្ធគយមធ្យមមកត្រឹមតែ ៧,៣% ប៉ុណ្ណោះ។
លើសពីវេទិកាសម្រាប់ការតាំងបង្ហាញផលិតផល CIIE ក្លាយទៅជានិមិត្តរូបនៃការប្តេជ្ញាចិត្តរបស់ប្រទេសចិន ក្នុងការពង្រឹងកិច្ចសហប្រតិបត្តិការសេដ្ឋកិច្ច ភាពជាដៃគូអន្តរជាតិ និងជំរុញកំណើនសកលប្រកបដោយចីរភាព។ ទោះបីស្ថានការណ៍ពិភពលោកមានការប្រែប្រួលឆាប់រហ័សយ៉ាងណា CIIE នៅតែបន្តដើរតួនាទីជាថ្នាលសម្រាប់ការពង្រឹងកិច្ចសហប្រតិបត្តិការពាណិជ្ជកម្មអន្តរជាតិ និងធ្វើឱ្យស៊ីជម្រៅនូវការបើកចំហរកម្រិតខ្ពស់ ដែលនឹងនាំមកនូវវិបុលរួមសម្រាប់តំបន់ និងពិភពលោក។
ដោយលោក ហ៊ូ ចំរើន
អ្នកស្រាវជ្រាវនៃមជ្ឈមណ្ឌលអភិវឌ្ឍន៍កម្ពុជា
