ប្រធានាធិបតីអាមេរិក លោក ដូណាល់ ត្រាំ បាននិយាយថា លោក បានចាប់អារម្មណ៍នឹងក្បួនព្យុហយាត្រាយោធារបស់ចិន ដែលមានការចូលរួមពីប្រធានាធិបតីរុស្ស៊ី លោក វ្ល៉ាឌីមៀ ពូទីន និងមេដឹកនាំកូរ៉េខាងជើង លោក គីម ជុងអ៊ុន នៅថ្ងៃនេះ ប៉ុន្តែមិនបានធ្វើឱ្យអាមេរិក ព្រឺនោះទេ។
លោក ត្រាំ បានលើកឡើងបែបនេះ នៅឯសេតវិមាន ដោយថា មិនបង្កបញ្ហាប្រឈម ឬក៏សម្ពាធសម្រាប់សហរដ្ឋអាមេរិកនោះទេ។
លោក បានសង្កត់ធ្ងន់ថា ខ្ញុំមានទំនាក់ទំនងល្អណាស់ជាមួយចិន ដូចដែលអ្នកដឹង ប៉ុន្តែចិនត្រូវការយើង ច្រើនជាងអ្វីដែលយើងត្រូវការពីចិន។
ប្រទេសចិន កំពុងរៀបចំប្រារព្ធខួបលើកទី ៨០ នៃជ័យជំនះក្នុងសង្គ្រាមប្រជាជនចិនប្រឆាំងនឹងការឈ្លានពានរបស់ជប៉ុន និងសង្រ្គាមប្រឆាំងហ្វាស៊ីសពិភពលោក។ ក្បួនព្យុហយាត្រាយោធាទ្រង់ទ្រាយធំ កំពុងប្រព្រឹត្តទៅ នៅថ្ងៃទី ៣ ខែកញ្ញា នៅទីលានធានអានមេន ទីក្រុងប៉េកាំង ដោយមានលោក ស៊ី, លោក ពូទីន និងមេដឹកនាំពិភពលោកផ្សេងទៀតចូលរួម៕
ដោយ៖ ពេជ្រ
