អ្នកនាំពាក្យឆ្មាំសមុទ្រ លោក Gan Yu បាននិយាយថា ប្រទេសចិន ចាត់ទុកសកម្មភាពថ្មីៗនេះរបស់ហ្វីលីពីននៅក្នុងដែនទឹកក្បែរតំបន់ជម្លោះទីពីរ Thomas Shoal (Ayungin Shoal) ក្នុងសមុទ្រចិនខាងត្បូងថាជាការបង្កហេតុ។
លោក បានលើកឡើង នៅក្នុងសេចក្តីថ្លែងការណ៍មួយថា ថ្មីៗនេះ នាវាហ្វីលីពីនខ្នាតតូច ២ គ្រឿង បានមកជិតនាវាល្បាតរបស់ចិន ដែលកំពុងបំពេញបេសកកម្មអនុវត្តច្បាប់ជាប្រចាំ ហើយបង្កឱ្យមានការប្រឈមមុខដាក់គ្នាដោយចេតនាក្នុងលក្ខណៈគ្មានវិជ្ជាជីវៈ និងគ្រោះថ្នាក់។
ទន្ទឹមនោះ អ្នកនាំពាក្យ ក៏បានបញ្ជាក់ថា នាវាទាំងនោះ មិនខ្វល់ពីការព្រមានម្តងហើយម្តងទៀតពីភាគីចិន នោះទេ។
លោក Gan Yu បានអះអាងថា ប៉ូលីសដែនសមុទ្រចិន “ធ្វើសកម្មភាពស្របច្បាប់” ក្នុងការគ្រប់គ្រងស្ថានការណ៍។
សេចក្តីថ្លែងការណ៍ បានបន្ថែមថា “យើងព្រមានភាគីហ្វីលីពីនថា ត្រូវតែបញ្ឈប់ជាបន្ទាន់រាល់ការបង្កហេតុ និងសកម្មភាពឃោសនាដែលរំលោភលើសិទ្ធិរបស់ចិន។
អ្នកនាំពាក្យរូបនេះ បានគូសបញ្ជាក់ថា ឆ្មាំឆ្នេរសមុទ្រចិន នឹងអនុវត្តសកម្មភាពការពារសិទ្ធិនៅក្នុងដែនទឹកទីពីរ Thomas Shoal និងការពារអធិបតេយ្យភាពជាតិនិងផលប្រយោជន៍ជាតិរបស់ចិននៅសមុទ្រ។
គួរបញ្ជាក់ថា អស់រយៈពេលជាច្រើនទសវត្សរ៍មកហើយ ប្រទេសចិន មានជម្លោះជាមួយប្រទេសមួយចំនួនជុំវិញកម្មសិទ្ធិលើទឹកដីនៃកោះមួយចំនួននៅក្នុងសមុទ្រចិនខាងត្បូង៕
ដោយ៖ ពេជ្រ
