កាលពិម្សិលមិញ សហព័ន្ធកីឡាបាល់ទាត់កម្ពុជា (FFC) បានបញ្ចេញបញ្ជីរាយនាមក្រុមជម្រើសជាតិកម្ពុជា អាយុក្រោម២៣ឆ្នាំ ចូលរួមប្រមូលផ្ដុំហ្វឹកហាត់ ត្រៀមសម្រាប់ការប្រកួតពានរង្វាន់ AFC U23 Asian Cup Saudi Arabia 2026 វគ្គជម្រុះ ដែលនឹងប្រព្រឹត្តទៅចាប់ពីថ្ងៃទី០៣ ដល់ថ្ងៃទី០៩ ខែកញ្ញា ឆ្នាំ២០២៥ នៅពហុកីឡដ្ឋានជាតិ (អូឡាំពិក)។
ក្នុងចំណោមកីឡាករ២៦រូបដែល FFC កោះហៅប្រមូលផ្ដុំហ្វឹកហាត់ រួមមាន៖ កីឡាករកងយោធពលខេមរភូមិន្ទុ ៣រូប កីឡាករណាហ្គាវើលដ៍៣រូប កីឡាករបឹងកេត៣រូប កីឡាករព្រះខ័នរាជស្វាយរៀង២រូប កីឡាករភ្នំពេញក្រោន៥រូប កីឡាករវិសាខា២រូប កីឡាករឡាហ្វ២រូប កីឡាករអង្គរថាយហ្គឺរ ៣រូប កីឡាករអាយអេអាយ ដង្កោសែនជ័យ១រូប កីឡាករអឹម អូ អាយ កំពង់ដេវ៉ា១រូប និងកីឡាករ York United FC ១រូប។
សម្រាប់ការប្រកួតនេះ U-23 កម្ពុជា នឹងធ្វើជាម្ចាស់ផ្ទះពូល G ដោយរួមមាន អ៊ីរ៉ាក់ អូម៉ង់ និងប៉ាគីស្ថាន។ ចំណែកការប្រកួតបើកឆាក កម្ពុជា ប៉ះអូម៉ង់ នៅថ្ងៃទី៣ ខែកញ្ញា នឹងប៉ះប៉ាគីស្ថាន ថ្ងៃទី៦ ខែកញ្ញា ចុងកក្រោយប៉ះអ៊ីរ៉ាក់ ថ្ងៃទី៩ ខែកញ្ញា ឆ្នាំ២០២៥ នៅពហុកីឡដ្ឋានជាតិអូឡាំពិក៕
