ប្រធានាធិបតីអាមេរិក លោក ដូណាល់ ត្រាំ បានប្រកាសជាផ្លូវការកាលពីម្សិលមិញអំពីការដាក់ពន្ធថ្មីចំនួន ២៥ ភាគរយលើរថយន្តដែលផលិតពីបរទេសទាំងអស់ដែលនាំចូលមកកាន់សហរដ្ឋអាមេរិក ក្នុងនោះយានជំនិះជប៉ុនក៏ត្រូវបានដាក់បញ្ចូលក្នុងវិធានការនេះផងដែរ។
លោក Trump បាននិយាយថាវិធានការនេះនឹងចូលជាធរមាននៅថ្ងៃទី ២ ខែមេសា ហើយការប្រមូលពន្ធនឹងចាប់ផ្តើមនៅថ្ងៃទី ៣ ខែមេសាតែម្តង។ លោកបានបន្ថែមថាវិធានការនេះនឹងបន្តមានជាអចិន្ត្រៃយ៍។
លោក Trump បានប្រាប់អ្នកយកព័ត៌មានថា នឹងមិនមានពន្ធលើរថយន្តដែលផលិតនៅសហរដ្ឋអាមេរិកនោះទេ។ វិធានការនោះក្នុងគោលបំណងនាំអាជីវកម្មមកប្រទេសវិញ។
ប្រធានាធិបតីសហរដ្ឋអាមេរិកបាននឹងកំពុងសង្កត់ធ្ងន់ពីចេតនារបស់លោកក្នុងការដាក់ពន្ធលើការនាំចូលរថយន្ត។ លោកទទូចថា រោងចក្រ និងការងារនៅអាមេរិកកំពុងរំកិលទៅក្រៅប្រទេសដោយសារចំនួនរថយន្តបរទេសដែលមានតម្លៃថោកនាំចូលកាន់តែច្រើនទ្បើងៗ។
ក្រុមហ៊ុនផលិតរថយន្តជប៉ុនដែលនាំចេញរថយន្តជាច្រើនទៅកាន់សហរដ្ឋអាមេរិកកំពុងប្រឈមនឹងការព្រួយបារម្ភកាន់តែខ្លាំងឡើងលើផលប៉ះពាល់អវិជ្ជមានលើពួកគេ ទាក់ទងការតម្លើងពន្ធរបស់លោក ត្រាំ៕
ដោយ៖ ពេជ្រ
