នាយករដ្ឋមន្ត្រីកាណាដា លោក Justin Trudeau បាននិយាយថា ប្រទេសរបស់លោកនឹងដាក់ពាក្យបណ្តឹងទៅអង្គការពាណិជ្ជកម្មពិភពលោក ដើម្បីតវ៉ានឹងការដំឡើងពន្ធរបស់សហរដ្ឋអាមេរិក បន្ថែមពីលើការដាក់ពន្ធសងសឹកលើទំនិញអាមេរិក។ ការលើកឡើងរបស់លោកធ្វើឡើងបន្ទាប់ពីរដ្ឋបាលរបស់ប្រធានាធិបតីអាមេរិក Donald Trump បានដាក់ពន្ធ ២៥ ភាគរយលើការនាំចូលពីប្រទេសកាណាដា។
នៅក្នុងសន្និសីទសារព័ត៌មានកាលពីថ្ងៃអង្គារ លោក Trudeau បាននិយាយថា ថ្ងៃនេះសហរដ្ឋអាមេរិកបានចាប់ផ្តើមសង្រ្គាមពាណិជ្ជកម្មប្រឆាំងនឹងប្រទេសកាណាដា ដែលជាដៃគូ និងសម្ព័ន្ធមិត្តជិតស្និទ្ធបំផុតរបស់ពួកគេ។ លោកបាននិយាយថា ប្រទេសកាណាដានឹងអនុវត្តពន្ធសងសឹកចំនួន ២៥ ភាគរយលើផលិតផលដែលនាំចូលពីសហរដ្ឋអាមេរិក។ ការយកពន្ធនឹងត្រូវកាត់ជាដំណាក់កាលក្នុងរយៈពេលជាង ៣ សប្តាហ៍ ហើយនៅទីបំផុតគ្របដណ្តប់លើការនាំចូលដែលមានតម្លៃសរុប ១៥៥ ពាន់លានដុល្លារកាណាដា ឬប្រហែល ១០៧ ពាន់លានដុល្លារអាមេរិក។
នាយករដ្ឋមន្ត្រីរូបនោះបាននិយាយថា ទីក្រុងអូតាវ៉ានឹងប្រកួតប្រជែងពន្ធគយរបស់សហរដ្ឋអាមេរិកដោយដាក់ពាក្យបណ្តឹងទាមទារដំណោះស្រាយវិវាទនៅ WTO ហើយក៏ស្ថិតនៅក្រោមច្បាប់នៃកិច្ចព្រមព្រៀងសហរដ្ឋអាមេរិក-ម៉ិកស៊ិក-កាណាដា ឬ USMCA ផងដែរ។
លោក Trudeau បាននិយាយថា ការដាក់ពន្ធគយមិនអាចមានភាពយុត្តិធម៌ទេ ដោយសារប្រទេសកាណាដាបាននិងកំពុងធ្វើការជាមួយសហរដ្ឋអាមេរិកលើវិធានការប្រឆាំងគ្រឿងញៀន។ លោកបានបន្ថែមថា អ្វីដែលលោក Trump ចង់ឃើញគឺ ការដួលរលំទាំងស្រុងនៃសេដ្ឋកិច្ចកាណាដា ព្រោះវានឹងធ្វើឱ្យវាកាន់តែងាយស្រួលក្នុងការបញ្ចូលពួកយើងទៅជារដ្ឋរបស់អាមេរិក។
កាណាដាមានបំណងរក្សាពន្ធសងសឹកនៅនឹងកន្លែង លុះត្រាតែពន្ធអាមេរិកត្រូវបានដកចេញ។ ទន្ទឹមនឹងនេះដែរ លោក Trump បាននិយាយនៅក្នុងការបង្ហោះប្រព័ន្ធផ្សព្វផ្សាយសង្គមថា ប្រសិនបើ Trudeau ដាក់ ពន្ធសងសឹកលើសហរដ្ឋអាមេរិក ពន្ធគយរបស់យើងនឹងកើនឡើងភ្លាមៗដោយចំនួនដូចគ្នាផងដែរ៕
ដោយ៖ ពេជ្រ
