ប្រធានាធិបតីប៉ាណាម៉ា លោក Jose Raul Mulino បាននិយាយថា ការគ្រប់គ្រងលើប្រឡាយប៉ាណាម៉ា នឹងនៅតែស្ថិតក្នុងដៃនៃប្រទេសអាមេរិកកណ្តាលមួយនេះ បើទោះបីជា មេដឹកនាំអាមេរិក លោក Donald Trump មានមហិច្ឆតាក្នុងការដណ្ដើមយកប្រែកជីកនេះក៏ដោយ ។
លោក Mulino បានលើកឡើងថា ក្នុងនាមសាធារណៈរដ្ឋប៉ាណាម៉ា និងប្រជាជន ខ្ញុំត្រូវតែបដិសេធទាំងស្រុងនូវពាក្យដែលលើកឡើងដោយប្រធានាធិបតី លោក Donald Trump នៅក្នុងសុន្ទរកថាពេលចូលកាន់តំណែងរបស់លោកទាក់ទងនឹងប៉ាណាម៉ា ក៏ដូចជាព្រែកជីក។
លោក បានបន្ថែមថា ចំពោះប៉ាណាម៉ា រដ្ឋបាលរបស់ខ្លួននឹងបន្តស្ថិតក្រោមការគ្រប់គ្រងរបស់ប៉ាណាម៉ា ដោយអនុលោមតាមអព្យាក្រឹតភាពអចិន្ត្រៃយ៍ ។ ដូច្នេះ មិនមានប្រទេសណាក្នុងពិភពលោកដែលជ្រៀតជ្រែកក្នុងការគ្រប់គ្រងព្រែកនោះទេ។
ទន្ទឹមនោះ បើតាមមន្រ្តីប៉ាណាម៉ា បានបញ្ជាក់ថា ប្រឡាយនេះមិនមែនជាដីសម្បទានឲ្យនរណាម្នាក់នោះទេ ដោយបន្ថែមថា វាគឺជាលទ្ធផលនៃការតស៊ូជាច្រើនជំនាន់ដែលឈានដល់សន្ធិសញ្ញា Torrijos-Carter ឆ្នាំ ១៩៩៩ ហើយចាប់ពីពេលនោះមករហូតដល់ពេលនេះអស់រយៈពេល ២៥ឆ្នាំមកហើយ ដែលយើងគ្រប់គ្រង និងពង្រីកវាដោយមិនឈប់ឈរ ដោយមានទំនួលខុសត្រូវបម្រើពិភពលោក និងពាណិជ្ជកម្មសកល រួមទាំង សហរដ្ឋអាមេរិក។
ជាមួយគ្នានោះ យោងតាម លោក Mulino ក៏បានបង្ហាញបំណងការពារសិទ្ធិនៃព្រែកជីកស្របតាមច្បាប់អន្តរជាតិ ដោយទទូចថា ការសន្ទនាគឺជាមធ្យោបាយដ៏ល្អបំផុតក្នុងការដោះស្រាយបញ្ហាជម្លោះដោយមិនធ្វើការសម្របសម្រួល អធិបតេយ្យភាពរបស់ប៉ាណាម៉ា និងសិទ្ធិពេញលេញរបស់ខ្លួនចំពោះព្រែកជីក ។
គួរបញ្ជាក់ថា លោក Trump ធ្លាប់បានរំលឹកឡើងវិញនូវចេតនារបស់លោក ក្នុងការគ្រប់គ្រងប្រឡាយប៉ាណាម៉ា ដែលជាផ្លូវទឹកសេដ្ឋកិច្ចដ៏មានសក្ដានុពលរបស់ពិភពលោក៕
ដោយ៖ ពេជ្រ
