ប្រធានាធិបតីអាមេរិកលោក Joe Biden បានថ្លែងឲ្យដឹងកាលពីថ្ងៃច័ន្ទថា ការសាងសង់ទីក្រុងឡូសអេនជឺលេសឡើងវិញ បន្ទាប់ពីភ្លើងឆេះព្រៃដ៏សាហាវ នឹងត្រូវចំណាយអស់រាប់សិបពាន់លានដុល្លារ។
លោកថា ទោះបីជារដ្ឋាភិបាលសហព័ន្ធនឹងរ៉ាប់រង ១០០% នៃការចំណាយសម្រាប់រយៈពេល ១៨០ ថ្ងៃក្រោយសម្រាប់ជាការរ៉ាប់រងលើការខូចខាតដូចជា ប្រាក់ឈ្នួលបន្ថែមម៉ោងរបស់អ្នកពន្លត់អគ្គីភ័យ ការដកយកចេញនូវកំទេចកំទី និងកន្លែងស្នាក់នៅបណ្តោះអាសន្នក៏ដោយ ករណីនោះនឹងចំណាយអស់រាប់សិបពាន់លានដុល្លារដើម្បីឱ្យទីក្រុង Los Angeles ត្រលប់ទៅកន្លែងដែលមានទិដ្ឋភាពសមរម្យទ្បើងវិញ។ លោក Biden បានថ្លែងបែបនេះនៅក្នុងសន្និសីទខ្លីមួយជាមួយក្រុមមន្ត្រីសង្គ្រោះបន្ទាន់។ លោកថា សភានឹងត្រូវបង្កើនការផ្តល់ថវិកាដើម្បីជួយអ្នកដែលរងគ្រោះដោយភ្លើងឆេះព្រៃ។
គួររំលឹកថា យ៉ាងហោចណាស់មនុស្ស ២៤ នាក់បានស្លាប់ចាប់តាំងពីអគ្គីភ័យជាច្រើនបានចាប់ផ្តើមកាលពីថ្ងៃអង្គារសប្តាហ៍មុន ហើយសំណង់ជាង ១២,០០០ រួមទាំងផ្ទះ អាជីវកម្ម និងផ្ទះគោរពបូជាត្រូវបានភ្លើងឆេះក្លាយទៅជាផេះ។
យោងតាមនាយកដ្ឋានព្រៃឈើ និងការពារភ្លើងរដ្ឋកាលីហ្វ័រញ៉ា បានឱ្យដឹងថា ផ្ទៃដីជាង ៤០,០០០ ហិចតាត្រូវបានដុតបំផ្លាញដោយភ្លើង Eaton, Palisades, Kenneth និង Hurst ខណការខិតខំទប់ស្កាត់ភ្លើងនៅតែបន្ត។
លោក Biden បានបញ្ជាក់ថា ប្រជាពលរដ្ឋដែលរងគ្រោះដោយអគ្គិភ័យនឹងទទួលបានប្រាក់សំណងម្តងចំនួន ៧៧០ ដុល្លារក្នុងម្នាក់ៗ។ លោកថា រហូតមកដល់ពេលនេះអ្នកនៅរស់រានមានជីវិតជិត ៦,០០០នាក់បានចុះឈ្មោះដើម្បីទទួលយកប្រាក់ ខណដែលការចំណាយមានរហូត ៥.១ លានដុល្លារ។ លោកបន្ថែមថា “ខ្ញុំលើកទឹកចិត្តអ្នកគ្រប់គ្នាដែលរងផលប៉ះពាល់ឱ្យទទួលបានជំនួយ” ហើយលោកប្តេជ្ញាថានឹងធ្វើ អ្វីគ្រប់យ៉ាងដែលអាចធ្វើទៅបាន ដើម្បីជួយ Los Angeles ហើយអ្នកស្រុកឆ្លងផុតគ្រោះមហន្តរាយ៕
ដោយ៖ ពេជ្រ
