ប៉ូលិសថៃ បានចោទប្រកាន់ម្ចាស់ដំរីមួយក្បាលពីបទធ្វេសប្រហែស បន្ទាប់ពីវាសម្លាប់ភ្ញៀវទេសចរជនជាតិអេស្ប៉ាញម្នាក់ នៅឯដែនជម្រកមួយកន្លែង នៅភាគខាងត្បូងប្រទេសថៃ កាលពីសប្តាហ៍មុន។
ស្ត្រីជនជាតិអេស្បាញអាយុ ២៣ ឆ្នាំស្លាប់ បន្ទាប់ពីដំរីមួយក្បាល បានវាយប្រហារលើរូបនាង នៅឯមជ្ឈមណ្ឌលថែទាំសត្វដំរី Koh Yao ក្នុងខេត្ត Phang Nga ប្រទេសថៃ ។
ប៉ូលិស បានចោទប្រកាន់ហ្មដំរីដែលជាបុគ្គលិកនៃដែនជម្រកសត្វព្រៃនេះ ពីបទធ្វេសប្រហែស ក្នុងការទប់ស្កាត់ហេតុការណ៍នេះ ។
មេប៉ូលិសក្នុងតំបន់ លោក Jaran Bangprasert បានប្រាប់ឲ្យដឹងថា យើងចោទប្រកាន់ហ្មដំរីពីបទធ្វេសប្រហែស បណ្តាលឱ្យមនុស្សស្លាប់ ហើយលោល នឹងត្រូវបញ្ជូនទៅតុលាការនៅថ្ងៃនេះ ។
គួរបញ្ជាក់ថា ហ្មដំរីដែលត្រូវបានប្រព័ន្ធផ្សព្វផ្សាយក្នុងស្រុកកំណត់អត្តសញ្ញាណថា ជាជនជាតិថៃអាយុ ៣៨ ឆ្នាំអាចប្រឈមនឹងការជាប់ពន្ធនាគាររហូតដល់ ១០ ឆ្នាំ និងពិន័យជាប្រាក់ ២០០,០០០ បាត (៥,៧០០ ដុល្លារ) ៕
ដោយ៖ ពេជ្រ
