រដ្ឋាភិបាលកូរ៉េខាងត្បូងបានឲ្យដឹងថា ខ្លួនគ្រោងនឹងស៊ើបអង្កេតរួមគ្នាជាមួយអាមេរិកលើករណីផ្ទុះយន្តហោះបណ្តាលឲ្យមនុស្សរាប់រយនាក់ស្លាប់ កាលពីថ្ងៃអាទិត្យ នៅភាគនិរតីប្រទេស។ ការផ្ទុះយន្តហោះនេះ បានសម្លាប់មនុស្ស ១៧៩ នាក់ ក្នុងចំណោម ១៨១ នាក់ ។
យន្តហោះដែលដំណើរការដោយក្រុមហ៊ុនអាកាសចរណ៍តម្លៃទាបរបស់កូរ៉េខាងត្បូង Jeju Air បានចាកចេញពីរដ្ឋធានីបាងកកប្រទេសថៃ ឆ្ពោះទៅកាន់ទីក្រុង Muan ។ មន្ត្រីនៃក្រសួងដឹកជញ្ជូន បានប្រកាសផែនការនេះ នៅក្នុងសន្និសីទសារព័ត៌មានមួយ នៅថ្ងៃចន្ទនេះ ខណដែលក្រុមអ្នកស៊ើបអង្កេត កំពុងបន្តពិនិត្យមើលការផ្ទុះយន្តហោះ Boeing 737 នៅអាកាសយានដ្ឋានអន្តរជាតិ Muan ។
ក្រុមមន្ត្រី បាននិយាយថា ពួកគេនឹងធ្វើការស៊ើបអង្កេតរួមគ្នាជាមួយក្រុមប្រឹក្សាសុវត្ថិភាពដឹកជញ្ជូនជាតិរបស់សហរដ្ឋអាមេរិក ដើម្បីវិភាគឧបករណ៍ថតទិន្នន័យជើងហោះហើរ និងឧបករណ៍ថតសំឡេងកាប៊ីនយន្តហោះដែលទាញយកពីយន្តហោះ ខណ Boeing គឺជាក្រុមហ៊ុនផលិតរបស់អាមេរិក។ ក្រុមមន្ត្រីបានបញ្ជាក់ថា ឧបករណ៍ថតទិន្នន័យជើងហោះហើរត្រូវបានរកឃើញថាបានខូចខាតមួយផ្នែក។
ទីភ្នាក់ងារសារព័ត៌មានយ៉ុនហាប់បានដកស្រង់សម្តីសមាជិកក្រុមប្រឹក្សាស៊ើបអង្កេតកូរ៉េខាងត្បូងដែលនិយាយថាការឌិកូដឧបករណ៍ថតទិន្នន័យហោះហើរតែមួយគ្រឿងអាចចំណាយពេលស៊ើបអង្កេតប្រហែលមួយខែបើធៀបនឹងឧបករណ៍ដែលមិនខូចខាតដែកប្រើរយៈពេលតែមួយសប្តាហ៍ប៉ុណ្ណោះ។
NTSB និយាយថាពួកគេកំពុងរៀបចំការស៊ើបអង្កេតជាមួយក្រុមហ៊ុន Boeing និង FAA រដ្ឋបាលអាកាសចរណ៍សហព័ន្ធសហរដ្ឋអាមេរិក។ ក្រុមហ៊ុន Boeing ឲ្យដឹងថា ក្រុមហ៊ុនកំពុងទាក់ទងជាមួយ Jeju Air ហើយត្រៀមខ្លួនជាស្រេចដើម្បីគាំទ្រពួកគេក្នុងការស៊ើបអង្កេត។
គួររំលឹកថា យន្តហោះបានធ្លាក់ក្បាលពោះ រអិលចេញពីផ្លូវរត់ បន្ទាប់មកបានបុករបាំងបេតុង ហើយបានឆាបឆេះជាអណ្តាតភ្លើងនៅព្រឹកថ្ងៃអាទិត្យ។ មានតែសមាជិកនាវិកពីរនាក់ប៉ុណ្ណោះដែលនៅរស់រានមានជីវិត។ ប្រព័ន្ធផ្សព្វផ្សាយបានឲ្យដឹងថា យន្តហោះបានចុះប៉ះផ្លូវនៅពេលដែលឧបករណ៍(កង់) សម្រាប់ចុះចតមិនដំណើរការ។ ប្រព័ន្ធផ្សព្វផ្សាយរបស់ប្រទេសកូរ៉េបានឲ្យដឹងថាការធ្លាក់យន្តហោះនេះជាគ្រោះថ្នាក់អាកាសចរណ៍ដែលស្លាប់ច្រើនបំផុតមិនធ្លាប់មានពីមុនមកនៅលើដីប្រទេសកូរ៉េ។
ប្រធានស្តីទីលោក Choi Sang-mok បានប្រកាសរយៈពេលប្រាំពីរថ្ងៃនៃការកាន់ទុក្ខជាតិរហូតដល់ថ្ងៃទី ៤ ខែមករានៅក្នុងកិច្ចប្រជុំបន្ទាន់មួយរបស់មន្រ្តីរដ្ឋាភិបាលពាក់ព័ន្ធចាប់ពីយប់ថ្ងៃអាទិត្យ៕
ដោយ៖ ពេជ្រ
