ខេត្តរតនគិរី៖ យុវជនពីរនាក់បានសន្លប់ស្តូកស្តឹងនៅកណ្តាលផ្លូវ បន្ទាប់ពីរថយន្តហ៉ីយ៉ាន់ដាយបើកប៉ះបណ្តាលឲ្យដួលម៉ូតូ។ ហេតុការណ៍គ្រោះថ្នាក់ចរាចរណ៍នេះបានកើតឡើង នៅវេលាម៉ោង១០និង៤០នាទីព្រឹក ថ្ងៃទី២៣ ខែធ្នូ ឆ្នាំ២០២៤ នៅតាមបណ្តោយផ្លូវជាតិលេខ៧៨ នៅក្បែរស្នាក់ការរដ្ឋាករគយ ស្ថិតក្នុងភូមិ១ សង្កាត់កាចាញ ក្រុងបានលុង។
មន្ត្រីនគរបាលប៉ុស្តិ៍រដ្ឋបាលសង្កាត់កាចាញ បានឲ្យដឹងថា ម៉ូតូជិះដោយយុវជនពីរនាក់បើកបរក្នុងទិសដៅពីត្បូងទៅជើង លុះមកដល់ត្រង់ចំណុចកើតហេតុ រថយន្តហ៉ីយ៉ាន់ដាយបានបើកចេញពីក្បែរផ្ទះមិនបានមើលគ្រប់ជ្រុងជ្រោយ ក៏ប៉ះនិងម៉ូតូកំពុងធ្វើចរាចរណ៍នៅលើដងផ្លូវ ម៉ូតូបុកចំក្បាលរថយន្ត។
មន្ត្រីនគរបាលបន្តថា យុវជនពីរនាក់ ១-ឈ្មោះ ញ៉ា ពៅ ភេទប្រុស អាយុ១៦ឆ្នាំ ជនជាតិខ្មែរ របួសធ្ងន់(សន្លប់ធំ)។២-ឈ្មោះ ញ៉ា វ៉ាន់ជី ភេទប្រុស អាយុ១៨ឆ្នាំ ជនជាតិខ្មែរ របួសធ្ងន់(សន្លប់ធំ)ទាំងពីរនាក់រស់នៅភូមិ៤ (សម្ងំកូន) សង្កាត់កាចាញ ក្រុងបានលុង ខេត្តរតនគិរី។ជិះម៉ូតូ១គ្រឿងម៉ាក ហុងដាឌ្រីម C125 ស៊េរីឆ្នាំ2014 ពណ៌ខ្មៅ ពាក់ស្លាកលេខ បន្ទាយមានជ័យ 1D-4990។ ជនរងគ្រោះពីរនាក់ត្រូវបានរថយន្តសង្គ្រោះបន្ទាន់របស់មន្ទីរពេទ្យបង្អែកខេត្តដឹកយកទៅសង្គ្រោះ។
ចំណែករថយន្ត១គ្រឿងម៉ាក ហ៉ីយ៉ាន់ដាយ ពុំមានស្លាកលេខមុខ,ក្រោយ ក្រោយពេលកើតហេតុ បានបើកយកមកចតទុកចោលនៅក្បែរស្នាក់ការគយ ធ្វើប្រងើយដូចជាមិនដឹងរឿងអ្វីកើតឡើងនោះឡើយ។
ក្រោយពេលកើតហេតុ សមត្ថកិច្ចមូលដ្ឋាននិងនគរបាលការិយាល័យចរាចរណ៍ស្នងការដ្ឋាននគរបាលខេត្ត ដើម្បីចុះមកធ្វើការអន្តរាគមន៍ វាស់វែងយករថយន្តនិងម៉ូតូទៅរក្សាទុកនៅការិយាល័យនគរបាលចរាចរណ៍ផ្លូវគោក ដើម្បីចាត់ការទៅតាមផ្លូវច្បាប់៕
