ប្រធានាធិបតីរុស្ស៊ី លោក វ្ល៉ាឌីមៀ ពូទីន បានសន្យាថានឹងសាកសួរអតីតមេដឹកនាំស៊ីរី រួមនឹងមេដឹកនាំស៊ីរីបច្ចុប្បន្ន អំពីជោគវាសនារបស់អ្នកកាសែតអាមេរិកម្នាក់ ដែលបានបាត់ខ្លួននៅក្នុងប្រទេសនេះកាលពី ១២ឆ្នាំមុន។
ក្នុងអំឡុងពេលសន្និសីទប្រចាំឆ្នាំនៅទីក្រុងមូស្គូ លោក Putin ត្រូវបានសួរដោយលោក Keir Simmons របស់សារព័ត៌មាន NBC ថាតើគាត់នឹងសួរអតីតប្រធានាធិបតីស៊ីរី Bashar Assad សម្រាប់ព័ត៌មានអំពីអ្វីដែលបានកើតឡើងចំពោះលោក Austin Tice អ្នកកាសែតដែរឬទេ។ លោក ពូ ទីន សន្យាថានឹងសួរទាំងអតីតមេដឹកនាំ និងមេដឹកនាំបច្ចុប្បន្នរបស់ស៊ីរី។
លោក Tice ដែលជាអ្នកកាសែតឯករាជ្យជនជាតិអាមេរិក និងជាមន្ត្រីកងម៉ារីនអាមេរិកជើងចាស់ម្នាក់បានបាត់ខ្លួននៅក្នុងប្រទេសស៊ីរីក្នុងខែសីហា ឆ្នាំ ២០១២ ខណៈដែលកំពុងនិយាយអំពីសង្គ្រាមស៊ីវិលរបស់ប្រទេសស៊ីរី។ ក្រោយមកមានសេចក្តីរាយការណ៍ថា អាជ្ញាធរស៊ីរីបានឃុំខ្លួនគាត់នៅភាគខាងត្បូងក្រុងដាម៉ាស ដោយសង្ស័យថាមានទំនាក់ទំនងជាមួយ CIA។
បន្ទាប់ពីការផ្តួលរំលំលោក Assad នៅដើមខែនេះ ក្រុមឧទ្ទាមដែលដឹកនាំដោយក្រុមសកម្មប្រយុទ្ធ Hayat Tahrir al-Sham (HTS) តាមសេចក្តីរាយការណ៍បានដោះលែងអ្នកទោសរាប់ពាន់នាក់ រួមទាំងជនបរទេសផងដែរ។ កាសែត រ៉យទ័រ បានកត់សម្គាល់កាលពីថ្ងៃចន្ទថាការស្វែងរកដ៏ធំមួយត្រូវបានចាប់ផ្តើមសម្រាប់លោក Tice ។ ចំណែកNBC បានរាយការណ៍កាលពីដើមសប្តាហ៍នេះថា Debra ម្តាយរបស់ Tice បានសរសេរសំបុត្រមួយទៅកាន់លោកពូទីនសុំជំនួយពីគាត់ក្នុងការស្វែងរកកូន។
លោក ពូទីន បានគាំទ្រលោក អាសាដ ជាយូរយារណាស់មកហើយ និងបានផ្តល់សិទ្ធិជ្រកកោនឱ្យគាត់ បន្ទាប់ពីការបណ្តេញគាត់ចេញពីប្រទេស។ យ៉ាងណាក៏ដោយទីក្រុងមូស្គូធ្លាប់បានបញ្ជាក់ថា ខ្លួនបានចូលរួមក្នុងការចរចាជាមួយមហាអំណាចថ្មីនៅក្រុងដាម៉ាសដើម្បីបញ្ចប់សង្រ្គាមស៊ីវិល។
ប្រធានាធិបតីអាមេរិកលោក Joe Biden បាននិយាយកាលពីដើមខែនេះថា ទីក្រុងវ៉ាស៊ីនតោនជឿថា Tice នៅមានជីវិតនៅឡើយ ខណៈពេលដែលទទួលស្គាល់ថាសហរដ្ឋអាមេរិកមិនមាន ភស្តុតាងផ្ទាល់ អំពីស្ថានភាពរបស់គាត់៕
ដោយ៖ ពេជ្រ
