ខេត្តរតនគិរី÷ ការប្រឡងសញ្ញបត្រ មធ្យមសិក្សាទុតិយភូមិនៅខេត្តរតនគិរី ឆ្នាំ២០២៥ មានបេក្ខជនចូលប្រឡងចំនួន ១,៩១០នាក់ ស្រី ១,០១៥នាក់ មានមណ្ឌលប្រឡងចំនួន ៣មណ្ឌល មានបន្ទប់សរុបចំនួន ៧៧បន្ទប់ ខណៈដំណើរការប្រឡងប្រព្រឹត្តទៅប្រកបដោយភាពរលូន នៅព្រឹកថ្ងៃទី២៨ ខែសីហា ឆ្នាំ២០២៥នេះ។
លោក ខាត់ សាម៉ាល់ ប្រធានមន្ទីរអប់រំយុវជន និងកីឡាខេត្តរតនគិរី បានលើកឡើងថា ការប្រឡងសញ្ញបត្រមធ្យមសិក្សាទុតិយភូមិ (បាក់ឌុប) ឆ្នាំសិក្សា២០២៤-២០២៥ ប្រព្រឹត្តទៅចំនួន២ថ្ងៃ ចាប់ពីថ្ងៃទី២៨-២៩ ខែសីហា ឆ្នាំ២០២៥។ ហើយដំណើរការប្រឡងសញ្ញាបត្រមធ្យមសិក្សាទុតិយភូមិ ចំណេះទូទៅ និងបំពេញវិជ្ជា សម្រាប់ខេត្តរតនគិរី ឆ្នាំ២០២៥ មានបេក្ខជនចូលរួមប្រឡងសរុបមានចំនួន ១,៩១០នាក់ ស្រី ១,០១៥នាក់។
ក្នុងនោះ ជនជាតិដើមភាគតិច ចំនួន ៧៨៣នាក់ ស្រី៣៩៤នាក់ រួមមាន៖ ជនជាតិគ្រឹង ១៨៦នាក់ ស្រី៨៦នាក់ ជនជាតិទំពួន២៩១នាក់ ស្រី១៦៥នាក់ ជនជាតិព្រៅ ៧៧នាក់ ស្រី៣៨នាក់ ជនជាតិចារ៉ាយ១៥៨នាក់ ស្រី៧៦នាក់ ជនជាតិកាចក់ ២៥នាក់ ស្រី ១៣នាក់ ជនជាតិកាវែត៣៩នាក់ ស្រី១១នាក់ ជនជាតិព្នង ២នាក់ ស្រី ០នាក់ ជនជាតិលុន ៥នាក់ ស្រី៥នាក់ ស្មើ ៤០.៩៩% ស្រី ៣៨.៨៥%។
ក្នុងចំនួនបេក្ខជនសរុបខាងលើ មានបេក្ខជនចំណេះទូទៅចំនួន១.៥៩០នាក់ ស្រី៨៦១នាក់ បេក្ខជនថ្នាក់បំពេញវិជ្ជា១៧៥នាក់ស្រី៨៦នាក់ បេក្ខជនស្វៃរិនចំណេះទូទៅ១០០នាក់ ស្រី៥១នាក់ បេក្ខជនស្វៃរិនបំពេញវិជ្ជា៤៥នាក់ ស្រី១៧នាក់។ចំពោះមណ្ឌលប្រឡងត្រូវបានកំណត់ជា ៣មណ្ឌល សរុប ៧៧បន្ទប់ ក្នុងនោះ ៖ មណ្ឌលវិទ្យាល័យសម្តេចឪ សម្តេចម៉ែ ៣៦បន្ទប់ មណ្ឌលវិទ្យាល័យហ៊ុន សែន ភូមិថ្មី ២៩បន្ទប់ និង មណ្ឌលអនុវិទ្យាល័យ ប៊ូ ថង ទេសអន្លុង១២បន្ទប់។
លោកប្រធានមន្ទីរបញ្ជាក់ទៀតថា ការប្រឡសញ្ញាបត្រមធ្យមសិក្សាទុតិយភូមិ ឆ្នាំ២០២៥នេះ មិនខុសគ្នាពីឆ្នាំមុនៗទេ បេក្ខជន-បេក្ខនារីទាំងអស់បានចូលក្នុងបន្ទប់ប្រឡងរៀងៗខ្លួន នៅតាមមណ្ឌលប្រឡង ដោយមានការត្រួតពិនិត្យ និងផ្ទៀងផ្ទាត់យ៉ាងយកចិត្តទុកដាក់ពីសំណាក់គណៈកម្មការអនុរក្ស និងក្រោមការពិនិត្យដោយអង្គភាពប្រឆាំងអំពើពុករលួយ មុននឹងឲ្យចូលក្នុងបន្ទប់ប្រឡងសំដៅធានាថាបេក្ខជនបេក្ខនារីទាំងអស់ មិនមានឱកាសបានយកសំណៅឯកសារ ព្រីយ៉ុង ឬម៉ាស៊ីនគិតលេខ ទូរស័ព្ទ ចូលក្នុងបន្ទប់ប្រឡងបានដាច់ខាត។
ដោយឡែក នៅក្រៅបរិវេណមណ្ឌលប្រឡង មានក្រុម ស.ស.យ.ក. ខេត្តបានជួយរៀបចំកន្លែងផ្ញើម៉ូតូដោយមិនគិតថ្លៃ និងមានកងកម្លាំងនគរបាល អាវុធហត្ថ ក្រុមគ្រូពេទ្យ ក៏មានវត្តមាន នៅមណ្ឌលប្រឡងទាំង៣នោះថែមទៀតផងដែរ។
ឯកឧត្តម ញ៉ែម សំអឿន អភិបាលខេត្តរតនគិរី ដែលបានអញ្ជើញចូលរួមបើកកញ្ចប់វិញ្ញាសារ ប្រឡងនៅព្រឹកថ្ងៃព្រហស្បតិ៍ ទី២៨សីហានេះ នៅមណ្ឌលប្រឡងវិទ្យាល័យសម្តេចឪ សម្តេចម៉ែ បានលើកទឹកចិត្តដល់ក្មួយៗដែលជាបេក្ខជន បេក្ខនារីទាំងអស់ ត្រូវខិតខំធ្វើឲ្យអស់ពីលទ្ធភាព និងថែទាំសុខភាពឲ្យបានល្អសម្រាកឲ្យបានគ្រប់គ្រាន់ និងជូនពរក្មួយៗប្រឡងជាប់និទ្ទេសAទាំងអស់គ្នា។
ឯកឧត្តម អភិបាលខេត្ត បានអំពាវនាវដល់បេក្ខជនទាំងអស់ ត្រូវគោរពបទប្បញ្ញត្តិនៃការប្រឡងឲ្យបានល្អប្រសើរ ជាពិសេសមិនត្រូវលាក់ទុកជាប់និងខ្លួននូវឧបករណ៍អេឡិចត្រូនិចគ្រប់ប្រភេទចូលក្នុងមណ្ឌលប្រឡង ឬបន្ទប់ប្រឡងជាដាច់ខាត។ ក្នុងករណីរកឃើញថា បានប្រព្រឹត្តសកម្មភាពផ្ទុយនិងបទប្បញ្ញត្តិ និងកម្រិតវិន័យ បេក្ខជននិងត្រូវបានកំណត់ឲ្យធ្លាក់ជាស្វ័យប្រវត្តិ មានន័យថា «អ្នកចេះ គឺជាប់»បានឆ្លើយតបនិងយុទ្ធសាស្ត្របញ្ចកោណរបស់រាជរដ្ឋាភិបាលកម្ពុជា ក្រោមការដឹកនាំរបស់សម្ដេចមហាបវរធិបតីហ៊ុន ម៉ាណែត នាយករដ្ឋមន្ត្រីនៃកម្ពុជា៕
