ភ្លៀងធ្លាក់ខ្លាំងវាយប្រហារលើភូមិជួរភ្នំហិមាល័យក្នុងតំបន់ Kashmir បានសម្លាប់មនុស្សយ៉ាងហោចណាស់ ៣៤ នាក់ កាលពីថ្ងៃព្រហស្បតិ៍។
លោក Pankaj Kumar Sharma ស្នងការស្រុក Kishtwar បាននិយាយថា យើងរកឃើញសាកសពចំនួន ៣៤ នាក់ និងអ្នករបួសចំនួន ៣៥ នាក់ ផ្សេងទៀត ដោយរំពឹងថាចំនួនអ្នកស្លាប់នឹងកើនឡើង។
គ្រោះមហន្តរាយនេះ បានកើតឡើងនៅភូមិ Chasoti នៃស្រុក Kishtwar ពោលគឺមួយសប្តាហ៍ បន្ទាប់ពីទឹកជំនន់ដ៏ខ្លាំង និងការរអិលបាក់ដីដែលវាយប្រហារភូមិមួយនៅតំបន់ជួរភ្នំហិម៉ាឡៃនេះដូចគ្នាក្នុងស្រុក Uttarakhand ។
យោងតាមមន្ត្រីក្នុងតំបន់ បានបញ្ជាក់ថា ចំនួនអ្នកស្លាប់ និងរងរបួស អាចនឹងមានការកើនឡើងបន្ថែមទៀត ខណៈទឹកជំនន់នេះ បានបំផ្លាញនូវផ្ទះសម្បែងប្រជាជន និងខ្លះត្រូវជម្លៀសចេញ៕
ដោយ៖ ពេជ្រ
