ប្រធានាធិបតីអាមេរិក លោក ដូណាល់ ត្រាំ បានបញ្ជាក់ពីកាលកំណត់បរិច្ឆេទថ្មី និងលឿនជាងមុនសម្រាប់ប្រទេសរុស្ស៊ី ដើម្បីយល់ព្រមលើបទឈប់បាញ់ ជុំវិញសង្គ្រាមនៅអ៊ុយក្រែន ពោលគឺរយៈពេល ១០ ឬ ១២ថ្ងៃ ធ្វើយ៉ាងណាឲ្យមានការបញ្ចប់ទាំងស្រុង។
លោកប្រធានាធិបតី ត្រាំ បាននិយាយថា គ្មានហេតុផលត្រូវរង់ចាំទៀតទេ ដោយសារតែមើលឃើញថាមិនមានការរីកចម្រើនណាមួយឆ្ពោះទៅរកសន្តិភាពទាល់តែសោះ ទោះទុកពេលយូរក៏ដោយ។
ទន្ទឹមនោះ ប្រធានាធិបតីអ៊ុយក្រែន លោក Volodymr Zelensky បានចាត់ទុកការអន្តរាគមន៍នេះថា មានសារៈសំខាន់ខ្លាំងណាស់ សម្រាប់ប្រទេសលោក ក្នុងការទទួលបានសន្តិភាព។
កាលពី ២សប្តាហ៍មុន លោក ត្រាំ បានទទូចថា ប្រធានាធិបតីលោក វ្ល៉ាឌីមៀ ពូទីន មានពេល ៥០ ថ្ងៃ ដើម្បីបញ្ចប់សង្រ្គាមជាមួយអ៊ុយក្រែន បើមិនដូច្នេះទេ រុស្ស៊ី នឹងប្រឈមមុខពន្ធគយធ្ងន់ធ្ងរ។
ទោះជាយ៉ាងណា ថ្លែងនៅក្នុងសន្និសីទសារព័ត៌មានក្នុងប្រទេសស្កុតឡេន លោក ត្រាំ បានសម្រេចបន្ថយថ្ងៃ និងរំលឹកឡើងវិញនូវការគំរាមកំហែងដាក់ទណ្ឌកម្ម និងពន្ធបន្ទាប់បន្សំលើទីក្រុងម៉ូស្គូ ៕
ដោយ៖ ពេជ្រ
