មនុស្ស ១០នាក់ រួមទាំងកុមារ ២នាក់ ត្រូវបានសម្លាប់ នៅព្រឹកថ្ងៃសុក្រ ក្នុងឧបទ្ទវហេតុក្រឡាប់ឡានក្រុង នៅប្រទេសវៀតណាម។
យោងតាមសេចក្តីថ្លែងការណ៍របស់រដ្ឋាភិបាល បានឲ្យដឹងថា ឡានក្រុងដែលកំពុងធ្វើដំណើរពីទីក្រុងហាណូយទៅកាន់ទីក្រុង Da Nang បានបើកធ្លាក់ផ្លូវ បណ្ដាលឲ្យជ្រុលទៅបុកបង្គោលភ្លើងនៅតាមដងផ្លូវ ហើយក្រឡាប់។
អ្នកស្លាប់ទាំងអស់ជាជនជាតិវៀតណាម។ ចំណែកអ្នករួមដំណើរ ១២នាក់ទៀត បានរងរបួស កំពុងបញ្ជូនទៅកាន់មន្ទីរពេទ្យ។
ប្រព័ន្ធផ្សព្វផ្សាយរដ្ឋ បានរាយការណ៍ថា អ្នកស្លាប់ គឺជាភ្ញៀវទេសចរក្នុងស្រុកដែលធ្វើដំណើរទៅកាន់ទីក្រុង Da Nang សម្រាប់ដំណើរកម្សាន្ត។
ឧបទ្ទវហេតុនេះ កើតឡើងត្រឹមតែមួយសប្តាហ៍បន្ទាប់ពីទូកទេសចរណ៍មួយបានក្រឡាប់នៅក្នុងឈូងសមុទ្រ Ha Long ដោយសម្លាប់អ្នកដំណើរ និងនាវិកវៀតណាមចំនួន ៣៨ នាក់ មានតែមនុស្ស ១០ នាក់ប៉ុណ្ណោះដែលនៅរស់រានមានជីវិត។ ក្រុមអ្នកជួយសង្គ្រោះ កំពុងបន្តស្វែងរកមនុស្សម្នាក់ដែលនៅបាត់ខ្លួន៕
ដោយ៖ ពេជ្រ
