អ្នកនាំពាក្យសេតវិមានលោកស្រី Karoline Leavitt បាននិយាយថា លោកប្រធានាធិបតីអាមេរិក ដូណាល់ ត្រាំ ហៅទូរស័ព្ទភ្លាមៗទៅនាយករដ្ឋមន្ត្រីអ៊ីស្រាអែល លោក Benjamin Netanyahu ដើម្បីពិភាក្សាអំពីស្ថានភាពនៃការបាញ់ផ្លោងលើព្រះវិហារ Holy Family Church នៅតំបន់ហ្គាហ្សាស្រ្ទីប។
អ្នកនាំពាក្យរូបនេះ បានប្រាប់អ្នកយកព័ត៌មានថា ការវាយប្រហារនេះ អាចធ្វើឲ្យលោក ត្រាំ មិនសប្បាយចិត្តនោះទេ។ លោក បានទូរស័ព្ទទៅលោកនាយករដ្ឋមន្ត្រី Netanyahu ដើម្បីជជែកពាក់ព័ន្ធនឹងការវាយប្រហារលើព្រះវិហារនៅហ្គាហ្សា។
អ្នកនាំពាក្យ ក៏បានបន្ថែមថា វាជាកំហុសរបស់អ៊ីស្រាអែល ក្នុងការវាយទៅលើព្រះវិហារកាតូលិកនោះ។
យោងតាម លោក Netanyahu ក៏បាននិយាយថា អ៊ីស្រាអែល មានការសោកស្តាយយ៉ាងខ្លាំងដែលគ្រាប់រំសេវមួយ ហោះសំដៅវាយប្រហារលើព្រះវិហារ Holy Family Church របស់ហ្គាហ្សា ។
លោក បន្តថា ជុំវិញបញ្ហានេះ អ៊ីស្រាអែល កំពុងតាមដានបន្ថែម ហើយនៅតែប្តេជ្ញាការពារជនស៊ីវិល និងព្រះវិហារ ។
កងកម្លាំងការពារអ៊ីស្រាអែល (IDF) រាយការណ៍ថា ជាកំហុសបច្ចេកទេស ក្នុងអំឡុងពេលសកម្មភាពប្រតិបត្តិការនៅក្នុងតំបន់ ដោយគ្រាប់ផ្លោងបាញ់ចំព្រះវិហារ។ មូលហេតុនៃឧប្បត្តិហេតុនេះកំពុងស្ថិតក្រោមការត្រួតពិនិត្យ។
គួរបញ្ជាក់ថា នេះជាការវាយប្រហារលើព្រះវិហារកាតូលិកតែមួយគត់ នៅហ្គាហ្សាស្ទ្រីប បានធ្វើឱ្យមនុស្ស ៣ នាក់ស្លាប់ និង ៩ នាក់រងរបួស៕
ដោយ៖ ពេជ្រ
