កាសែត The New York Times បានរាយការណ៍ថា លោកនាយករដ្ឋមន្ត្រីអ៊ីស្រាអែល Benjamin Netanyahu ហាក់មិនពេញចិត្តសម្រាប់បទឈប់បាញ់ណាមួយនៅតំបន់ហ្គាហ្សាស្រ្ទីបនោះទេ ដោយក្រោមហេតុផលដើម្បីបន្តជីវិតនយោបាយរបស់លោកផ្ទាល់។
យោងតាមរបាយការណ៍ បានឲ្យដឹងថា ក្រោមសម្ពាធពីសម្ព័ន្ធមិត្តស្តាំនិយម លោក Netanyahu ព្យាយាមពន្យារការចរចារដែលចាំបាច់ ស្របពេលចលនារ៉ាឌីកាល់ប៉ាឡេស្ទីនហាម៉ាស់ ត្រៀមខ្លួនសម្រាប់កិច្ចព្រមព្រៀង។
លោក Netanyahu បានទទូចឲ្យបន្តការប្រយុទ្ធគ្នា ទោះបីជាពេលដែលមេទ័ពកំពូលរបស់អ៊ីស្រាអែល គិតថាមិនចាំបាច់ក៏ដោយ។ បទឈប់បាញ់សំខាន់ៗ ត្រូវបានលោក Netanyahu បំពានក្រោមហេតុផលកម្ចាត់ក្រុមហាម៉ាស់។
NYT បានបន្ថែមថា ការមិនចង់បញ្ចប់សង្រ្គាមនៅតំបន់ហ្គាហ្សា នាំឱ្យមានការស្លាប់របស់ជនជាតិប៉ាឡេស្ទីនរាប់ពាន់នាក់ រារាំងការវិលត្រឡប់របស់ចំណាប់ខ្មាំងមួយចំនួនដែលនៅរស់ ការបែកបាក់កាន់តែស៊ីជម្រៅនៅក្នុងសង្គមអ៊ីស្រាអែល បង្អាក់សន្ធិសញ្ញាសន្តិភាពជាមួយអារ៉ាប៊ីសាអូឌីត និងធ្វើឱ្យមុខមាត់របស់ក្រុងយេរ៉ូសាឡឹម ខូចគុណភាពក្នុងក្រសែភ្នែកសហគមន៍អន្តរជាតិ។
ទោះជាយ៉ាងណា សម្រាប់លោក Netanyahu ផ្ទាល់ គិតថាផលវិបាកទាំងនេះ ជាផលប្រយោជន៍យ៉ាងសំខាន់សម្រាប់លោក ដើម្បីបន្តកាន់អំណាច៕
ដោយ៖ ពេជ្រ
