ភ្នាក់ងារកម្មវិធីស្បៀងអាហារពិភពលោក (WFP) របស់អង្គការសហប្រជាជាតិ រាយការណ៍ថា ហ្វូងមនុស្សស្រេកឃ្លានជាច្រើន បាននាំគ្នាបុកចូលទៅក្នុងឃ្លាំងផ្គត់ផ្គង់អាហារមួយនៅកណ្តាលហ្គាហ្សា។
ភ្នាក់ងារ បន្ថែមថា មនុស្ស ២ នាក់ ត្រូវបានគេរាយការណ៍ថាបានស្លាប់ និងជាច្រើននាក់ទៀតរងរបួស នៅក្នុងឧបទ្ទវហេតុនេះ។
រូបភាពវីដេអូពីទីភ្នាក់ងារព័ត៌មាន AFP បានបង្ហាញឲ្យឃើញ ហ្វូងមនុស្សយ៉ាងច្រើន បានទម្លុះចូលឃ្លាំង Al-Ghafari ក្នុងទីក្រុង Deir Al-Balah ដោយយកថង់ម្សៅ និងប្រអប់អាហារ ខណក៏មានលឺស្នូរគ្រាប់កាំភ្លើងផ្ទុះ ផងដែរ តែមិនទាន់ដឹងច្បាស់ថាមកពីណានោះទេ។
នៅក្នុងសេចក្តីថ្លែងការណ៍មួយ អង្គការ WFP បានបញ្ជាក់ថា តម្រូវការមនុស្សធម៌នៅក្នុងតំបន់ហ្គាហ្សា គឺចាំបាច់ខ្លាំងណាស់ បន្ទាប់ពីការបិទផ្លូវរបស់អ៊ីស្រាអែល ជិត ៣ ខែមកនេះ ។
ទន្ទឹមនោះ WFP ដដែល អះអាងថា ហ្គាហ្សា ពេលនេះ គឺត្រូវការជំនួយផ្នែកស្បៀងអាហារជាបន្ទាន់។ នេះជាមធ្យោបាយតែមួយគត់ដើម្បីធានាប្រជាជនថាពួកគេនឹងមិនអត់ឃ្លាន ដាច់ពោះស្លាប់។
ទោះជាយ៉ាងណា WFP បានព្រមានជាប់លាប់អំពីស្ថានភាពប្រកាសអាសន្ន និងកាន់តែយ៉ាប់យ៉ឺននៅលើដី រួមទាំងហានិភ័យកាន់តែធណ សម្រាប់ប្រជាជនស្រេកឃ្លានដែលត្រូវការជំនួយ។
យោងតាម អាជ្ញាធរអ៊ីស្រាអែល បានបញ្ជាក់ កាលពីថ្ងៃពុធថា រថយន្តដឹកជំនួយចំនួន ១២១ គ្រឿងដែលជាកម្មសិទ្ធិរបស់អង្គការសហប្រជាជាតិ និងសហគមន៍អន្តរជាតិ ត្រូវបានអនុញ្ញាតឲ្យចូលទៅក្នុងតំបន់ហ្គាហ្សា។
គួរបញ្ជាក់ថា អ៊ីស្រាអែល បានចាប់ផ្តើមអនុញ្ញាតឱ្យមានការផ្តល់ជំនួយក្នុងចំនួនកំណត់ចូលក្នុងតំបន់ហ្គាហ្សា កាលពីសប្តាហ៍មុន៕
ដោយ៖ ពេជ្រ
