ខ្សែប្រយុទ្ធ Andres Nieto បានបង្ហើបពីការចាកចេញពីក្លិប ភ្នំពេញក្រោន ក្រោយរួមរស់ជាមួយគ្នាអស់រយៈពេល ៥ឆ្នាំ។ ទោះបីយ៉ាងណា កីឡាកររូបនេះមិនទាន់បានប្រាប់លម្អិតអំពីអនាគតរបស់ខ្លួននាពេលបន្ទាប់ និងទៅលេងនៅក្លិបណា ឬប្រទេសណានៅឡើយទេ។
Andres Nieto បានបង្ហើបបែបនេះ ក្រោយជួយឱ្យ ភ្នំពេញក្រោន ឈ្នះពានរង្វាន់សម្តេចតេជោ ហ៊ុន សែន រដូវកាល ២០២៤-២០២៥ បន្ទាប់ពីរូបគេស៊ុតបញ្ចូលទីមួយគ្រាប់នៅនាទីទី ៧៩ ជួយឱ្យក្រុម សិង្ហក្រហម យកឈ្នះលើក្រុមព្រះខ័នរាជស្វាយរៀង ក្នុងលទ្ធផល ២-១ នៅពហុកីឡដ្ឋានជាតិមរតកតេជោ កាលពិយប់មិញ។
គួរបញ្ជាក់ថា Nieto បានចូលរួមជាមួយ ភ្នំពេញក្រោន នៅឆ្នាំ ២០១៩ ខណៈក្នុងការលេងនៅទឹកដី Smart RSN រយៈពេល ៦ ឆ្នាំមកនេះ រូបគេបានជួយឱ្យភ្នំពេញក្រោនឈ្នះពានលីគកំពូលកម្ពុជា Cambodian Premier League ២ លើក, ពាន Cambodian League Cup ២ លើក និងពានសម្តេចហ៊ុន សែន ១ លើក៕(ប្រភព៖ កម្ពុជាថ្មី)
