ប្រធានាធិបតីអាមេរិកលោក Donald Trump បានសន្យាក្នុងកិច្ចព្រមព្រៀងវិនិយោគដ៏ធំមួយជាមួយអារ៉ាប៊ីសាអូឌីត។ កិច្ចព្រមព្រៀងនេះរួមបញ្ចូលនូវអ្វីដែលត្រូវបានគេនិយាយថា ជាការទិញអាវុធក្នុងទំហំដ៏ធំបំផុតដែលមិនធ្លាប់មាន និងជាអាវុធផលិតដោយសហរដ្ឋអាមេរិក។
លោក Trump បានជួបពិភាក្សាជាមួយព្រះអង្គម្ចាស់ Mohammed bin Salman ក្នុងទីក្រុង Riyadh កាលពីថ្ងៃអង្គារ។ លោកបាននិយាយថា យន្តហោះចម្បាំងរបស់យើង កាំជ្រួចរបស់យើង ប្រព័ន្ធការពារ Patriots របស់យើង និយាយរួមយើងមានឧបករណ៍ល្អបំផុតលើលោក។ លើសពីនេះ អ្នកកំពុងទិញរបស់ប្លែកៗជាច្រើន ហើយខ្ញុំពេញចិត្តណាស់។
សេតវិមានបានចេញសេចក្តីថ្លែងការណ៍មួយដោយនិយាយថា សហរដ្ឋអាមេរិក និងអារ៉ាប៊ីសាអូឌីតបានយល់ព្រមពង្រឹង ភាពជាដៃគូយុទ្ធសាស្ត្រ របស់ពួកគេ។ សេចក្តីថ្លែងការណ៍បានបន្ថែមថា អារ៉ាប៊ីសាអូឌីតកំពុងប្តេជ្ញាចិត្តក្នុងការវិនិយោគ ៦០០ ពាន់លានដុល្លារនៅក្នុងសហរដ្ឋអាមេរិក។ ថវិកាទាំងនោះរួមមានលុយសម្រាប់កិច្ចព្រមព្រៀងអាវុធដែលមានតម្លៃ១៤២ពាន់លានដុល្លារ។ អាមេរិកនឹងលក់ទំនិញដែលទាក់ទងនឹងការការពារកាំជ្រួច សន្តិសុខដែនសមុទ្រ និងការធ្វើទំនើបកម្មកងទ័ពក្នុងចំណោមផលិតផលផ្សេងៗទៀត។
មេដឹកនាំអារ៉ាប៊ីសាអូឌីតសង្ឃឹមថា ការទិញអាវុធដ៏ច្រើនសន្ធឹកសន្ធាប់នេះនឹងអនុញ្ញាតឱ្យពួកគេរក្សាបាននូវឧត្តមភាពយោធានៅក្នុងតំបន់។
លោក Trump គ្រោងនឹងជួបជាមួយប្រធានាធិបតីបណ្តោះអាសន្នរបស់ប្រទេសស៊ីរី លោក Ahmed al-Sharaa នៅថ្ងៃពុធផងដែរ មុនពេលចាកចេញពីប្រទេសអារ៉ាប៊ីសាអូឌីត។ លោកថ្លែងថា លោកនឹងចេញដីកាដកទណ្ឌកម្មលើប្រទេសស៊ីរី។ បន្ទាប់មកគាត់នឹងធ្វើដំណើរទៅកាតា និងអារ៉ាប់រួម៕
ដោយ៖ពេជ្រ
