រាជធានីភ្នំពេញ៖ នាព្រឹកថ្ងៃទី៧ ខែឧសភា ឆ្នាំ២០២៥ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានអញ្ជើញជាអធិបតី ក្នុងពិធីបើកយុទ្ធនាការសុវត្ថិភាពចំណីអាហារក្នុងសាលារៀន ក្រោមប្រធានបទ “សុខភាពកុមារ និងជាតិដែក” និងមានការអញ្ជើញចូលរួមពីសំណាក់ លោក Danish Rahman នាយកគ្រប់គ្រងទូទៅក្រុមហ៊ុន Danone ប្រចាំតំបន់អាស៊ីអាគ្នេយ៍ ឯកឧត្តម លោកជំទាវ ថ្នាក់ដឹកនាំក្រសួងអប់រំ យុវជន និងកីឡា លោក Maarten VAN LEEUWEN នាយកគ្រប់គ្រងក្រុមហ៊ុន Danone ប្រចាំប្រទេសកម្ពុជា និងមីយ៉ាន់ម៉ា លោក លោកស្រី ភាគីពាក់ព័ន្ធជាតិ និងអន្តរជាតិ សិល្បករ សិល្បការិនី អ្នកផលិតមាតិកា គណៈគ្រប់គ្រងសាលារៀន លោកគ្រូ អ្នកគ្រូ និងសិស្សានុសិស្សជាច្រើននាក់។
យុទ្ធនាការសុវត្ថិភាពចំណីអាហារក្នុងសាលារៀន ក្រោមប្រធានបទ «សុខភាពកុមារ និងជាតិដែក» គឺជាគំនិតផ្តួចផ្តើមរួមគ្នាដោយក្រសួងអប់រំ យុវជន និងកីឡា និងក្រុមហ៊ុន Danone ប្រចាំតំបន់អាស៊ីអាគ្នេយ៍ ដើម្បីរួមគ្នាកាត់បន្ថយភាពស្លេកស្លាំងដោយសារកង្វះជាតិដែកលើកុមារ និងផ្សព្វផ្សាយការអនុវត្តសុវត្ថិភាពចំណីអាហារតាមសាលារៀននៅប្រទេសកម្ពុជា។
ក្នុងឱកាសនេះ លោក Danish Rahman នាយកគ្រប់គ្រងទូទៅ ក្រុមហ៊ុន Danone ប្រចាំតំបន់អាស៊ីអាគ្នេយ៍ បានលើកឡើងពីបេសកកម្មរបស់ក្រុមហ៊ុន Danone ក្នុងការផ្តល់អាហារតាមរយៈសុខភាពទៅកាន់មនុស្សកាន់តែច្រើនតាមដែលអាចធ្វើទៅបាន។ ដូចនេះហើយ ក្រុមហ៊ុន Danone កម្ពុជា គាំទ្រ និងបន្តកិច្ចសហការជាមួយក្រសួងអប់រំ យុវជន និងកីឡា ក្នុងការចូលរួមកាត់បន្ថយភាពស្លេកស្លាំង ដោយសារកង្វះជាតិដែក ដើម្បីធានាបានថា កុមារទទួលបានអ្វីដែលល្អបំផុត តាមរយៈការបង្កើនចំណេះដឹង ការត្រួតពិនិត្យភាពស្លេកស្លាំង និងការផ្តល់អាហារូបត្ថម្ភមានជាតិដែក និងវីតាមីនស៊ី ជាដំណោះស្រាយសុខភាព ដែលអាចជួយឱ្យកុមារលូតលាស់បានយ៉ាងពេញលេញ។
មានប្រសាសន៍ក្នុងឱកាសនេះ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានកោតសរសើរ និងថ្លែងអំណរគុណយ៉ាងជ្រាលជ្រៅចំពោះក្រុមហ៊ុន Danone ប្រចាំកម្ពុជា ដែលបានយកចិត្តទុកដាក់លើកកម្ពស់សុខុមាលភាព និងសុខភាពប្រជាជនកម្ពុជា ក៏ដូចជាសិស្សានុសិស្ស តាមរយៈយុទ្ធនាការសុវត្ថិភាពចំណីអាហារតាមសាលារៀនដែលនឹងផ្តល់ការអប់រំទៅដល់គណៈគ្រប់គ្រងសាលារៀន លោកគ្រូ អ្នកគ្រូ មាតាបិតា សិស្សនុសិស្ស និងសាធារណជនឱ្យកាន់តែយល់ដឹងអំពី៖
១. ការបង្កើតទម្លាប់បរិភោគអាហារប្រចាំថ្ងៃ ៣ក្រុម អាហារថាមពល អាហារសាងសង់ និងអាហារការពារ (តិចខ្លាញ់ តិចអំបិល តិចស្ករ)។
២. អាហារូបត្ថម្ភមានជាតិដែក និងវីតាមីនស៊ី។
៣. ការចៀសវាងភេសជ្ជៈផ្អែម។
រាជរដ្ឋាភិបាលកម្ពុជាគ្រប់នីតិកាលទាំងអស់ តែងតែយកចិត្តទុកដាក់ខ្ពស់លើ កត្តាសុខភាពរបស់សិស្ស ក៏ដូចជាប្រជាជនកម្ពុជាទាំងមូល។ ថ្មីៗនេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានលើកឡើងនូវសមាសធាតុអាទិភាពមួយ ក្នុងការលើកកម្ពស់សុខុមាលភាពរស់នៅរបស់ប្រជាជនលើគោលនយោបាយជាច្រើនរបស់រាជរដ្ឋាភិបាលជាច្រើនអាណត្តិបន្តបន្ទាប់មកក៏ដូចជាបច្ចុប្បន្ននេះ គឺផ្ដោតការយកចិត្តទុកដាក់ទៅលើតម្រូវការធំៗចំនួនបីរបស់ប្រជាពលរដ្ឋគឺ៖ សុខភាព ចំណេះដឹង បំណិនជីវិត និងជីវភាពរស់នៅ។
ជាការឆ្លើយតបទៅនឹងយុទ្ធសាស្ត្របញ្ចកោណដំណាក់កាលទី១ និងវិធានការគន្លឹះរបស់ សម្តេចមហាបវរធិបតី នាយករដ្ឋមន្ត្រី លើវិធានការទី៣ “ការថែរក្សាសុខភាពសិស្ស តាមរយៈកម្មវិធីអាហារូបត្ថម្ភរបស់កុមារ និងការត្រួតពិនិត្យគុណភាពអាហារនៅតាមសាលារៀន” ក្រសួងបានដាក់ចេញនូវគោលនយោបាយជាច្រើន រួមមាន គោលនយោបាយស្តីពី “សុខភាពសិក្សា” “អាហារូបត្ថម្ភ” និង “ការផ្តល់អាហារតាមសាលារៀន ឆ្នាំ២០២៤-២០៣៥” ដោយប្រើប្រាស់កសិផលក្នុងសហគមន៍ ស្របតាម “ក្របខ័ណ្ឌគោលនយោបាយជាតិគាំពារសង្គមឆ្នាំ២០២៥” ដើម្បីធានាបានសុវត្ថិភាពចំណីអាហារ និងអាហារូបត្ថម្ភ ព្រមទាំងគាំទ្រការអភិវឌ្ឍសេដ្ឋកិច្ចសហគមន៍មូលដ្ឋាន សំដៅឆ្លើយតបទៅនឹងបញ្ហាកង្វះអាហារូបត្ថម្ភ អសន្តិសុខស្បៀងក្នុងគ្រួសារនិងសហគមន៍ ការជំរុញភាពលូតលាស់ និងដើម្បីលើកកម្ពស់ការសិក្សារបស់កុមារ។
សាជាថ្មីម្តងទៀត ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី ជឿជាក់ថា យុទ្ធនាការសុវត្ថិភាពចំណីអាហារតាមសាលារៀន នឹងក្លាយជាវេទិកាមួយយ៉ាងសំខាន់ នៃការលើកកម្ពស់ការយល់ដឹងរបស់សិស្សលើផ្នែកសុវត្ថិភាពចំណីអាហារ សម្រាប់ការវិនិយោគរយៈពេលវែងលើការអភិវឌ្ឍធនធានមនុស្ស។ យុទ្ធនាការនេះនឹងដើរតួនាទីយ៉ាងសំខាន់ក្នុងការលើកកម្ពស់សុខភាពកុមារ និងជាតិដែក ការប្រយុទ្ធប្រឆាំងនឹងបញ្ហាកង្វះអាហារូបត្ថម្ភ ភាពស្លេកស្លាំង និងការជំរុញភាពលូតលាស់ ក្នុងគោលដៅកសាងមូលធនមនុស្សជំនាន់ក្រោយប្រកបដោយសុខភាព ការអប់រំ និងភាពធន់ដែលនឹងរួមចំណែកដល់ការអភិវឌ្ឍសេដ្ឋកិច្ចនិងសង្គមប្រកបដោយគុណភាព និងចីរភាព៕
