រដ្ឋមន្ត្រីការពារជាតិប៉ាគីស្ថានបានថ្លែងប្រាប់រ៉យទ័រកាលពីថ្ងៃចន្ទថា ប្រទេសប៉ាគីស្ថានរំពឹងថានឹងមានការវាយប្រហារយោធាឥណ្ឌាបន្ទាប់ពីការវាយប្រហារដ៏សាហាវកាលពីសប្តាហ៍មុននៅក្នុងតំបន់ Jammu និង Kashmir ដែលគ្រប់គ្រងដោយឥណ្ឌា។
កាលពីថ្ងៃទី២២ ខែមេសា ក្រុមសកម្មប្រយុទ្ធបានបាញ់សម្លាប់អ្នកទេសចរចំនួន ២៦នាក់ នៅក្រុង Pahalgam រដ្ឋ Kashmir។ ការវាយប្រហារនេះបានបង្កឱ្យមានការខឹងសម្បារនៅទូទាំងប្រទេសឥណ្ឌាដែលភាគច្រើនជាហិណ្ឌូ និងនាំឱ្យមានការអំពាវនាវឱ្យមានចំណាត់ការឆាប់រហ័សប្រឆាំងនឹងប៉ាគីស្ថានដែលភាគច្រើនជាមូស្លីម។
ថ្លែងទៅកាន់ Reuters រដ្ឋមន្ត្រីការពារជាតិប៉ាគីស្ថានលោក Khawaja Asif បាននិយាយថា យោធារបស់ប្រទេសបានត្រៀមខ្លួនរួចជាស្រេចដើម្បីប្រឈមមុខនឹងការគំរាមកំហែងដែលកំពុងកើនឡើង។ លោកថា“យើងបានពង្រឹងកម្លាំងរបស់យើង ព្រោះវាជាអ្វីមួយដែលជិតមកដល់ឥឡូវនេះ ហើយក្នុងស្ថានភាពនោះ ការសម្រេចចិត្តជាយុទ្ធសាស្រ្តមួយចំនួនត្រូវតែធ្វើឡើង ។
យោងតាមលោក Asif យោធាប៉ាគីស្ថានបានប្រាប់រដ្ឋាភិបាលអំពីលទ្ធភាពនៃការវាយប្រហាររបស់ឥណ្ឌា។ ទោះជាយ៉ាងណាក៏ដោយ គាត់មិនបានផ្តល់នូវភាពជាក់លាក់បន្ថែមទៀតទាក់ទងនឹងការស៊ើបការណ៍សម្ងាត់ដែលផ្អែកលើការវាយតម្លៃរបស់គាត់នោះទេ។
ទីក្រុងញូវដែលីបានចោទប្រកាន់ទីក្រុងអ៊ីស្លាម៉ាបាដថាបានគាំទ្រពួកសកម្មប្រយុទ្ធនៅតំបន់កាស្មៀរ ដែលជាតំបន់ព្រំដែនដែលប្រទេសទាំងពីរ ហើយដែលជាប្រភពនៃសង្គ្រាមពីមុនរវាងពួកគេ។
នាយករដ្ឋមន្ត្រីឥណ្ឌាលោក Narendra Modi បានថ្កោលទោសការវាយប្រហារនេះ ហើយបានប្ដេជ្ញាឆ្លើយតបយ៉ាងម៉ឺងម៉ាត់។ លោកបានថ្លែងថា “ខ្ញុំនិយាយទៅកាន់ពិភពលោកទាំងមូលថា ឥណ្ឌានឹងកំណត់អត្តសញ្ញាណ តាមដាន និងដាក់ទណ្ឌកម្មរាល់ភេរវករ និងអ្នកគាំទ្ររបស់ពួកគេ។ យើងនឹងដេញតាមពួកគេរហូតដល់ទីបញ្ចប់នៃផែនដី”។ លោកបន្តថា រាល់ការខិតខំប្រឹងប្រែងនឹងត្រូវធ្វើដើម្បីធានាថាយុត្តិធម៌ត្រូវបានធ្វើសម្រាប់ឥណ្ឌា។
គួររំលឹកថា មកទល់ពេលនេះ ញូវដែលីបានចាត់វិធានការការទូតតែប៉ុណ្ណោះក្នុងការសងសឹក រួមទាំងការបណ្តេញជនជាតិប៉ាគីស្ថានទាំងអស់នៅក្នុងប្រទេស ការបិទព្រំដែន Wagah-Attari រវាងប្រទេសទាំងពីរ និងការផ្អាកសន្ធិសញ្ញាទឹក Indus ឆ្នាំ ១៩៦០ លើការប្រើប្រាស់រួមគ្នានៃប្រព័ន្ធទន្លេ Indus ។
ទីក្រុងអ៊ីស្លាម៉ាបាដបានបដិសេធការជាប់ពាក់ព័ន្ធណាមួយនឹងភេរវកម្ម ហើយបានអំពាវនាវឱ្យមានការស៊ើបអង្កេតអព្យាក្រឹត និងតម្លាភាពចំពោះឧប្បត្តិហេតុនេះ។
រដ្ឋមន្ត្រីការពារជាតិបានសង្កត់ធ្ងន់ថា ប៉ាគីស្ថាននៅតែមានការប្រុងប្រយ័ត្នខ្ពស់ ប៉ុន្តែបាននិយាយថា ឃ្លាំងអាវុធនុយក្លេអ៊ែររបស់ខ្លួននឹងត្រូវបានប្រើប្រាស់ប្រសិនបើមាន “ការគំរាមកំហែងដោយផ្ទាល់ចំពោះអត្ថិភាពរបស់យើង”។
សូមជម្រាបថា ភាពតានតឹងជុំវិញតំបន់កាស្មៀរបាននាំឱ្យមានការផ្ទុះអាវុធរវាងឥណ្ឌា និងប៉ាគីស្ថាន ដែលប្រទេសទាំងពីររក្សាបាននូវការដាក់ពង្រាយទ័ពសំខាន់ៗនៅក្នុងតំបន់៕
ដោយ៖ ពេជ្រ
