រដ្ឋមន្ត្រីក្រសួងហិរញ្ញវត្ថុថៃ លោក Pichai Chunhavajira បានឲ្យដឹង កាលពីថ្ងៃសុក្រពីការកាត់បន្ថយពន្ធលើការនាំចូលពោតពីសហរដ្ឋអាមេរិក ។
ប្រទេសថៃ ស្ថិតក្នុងចំណោមប្រទេសក្នុងតំបន់អាស៊ីអាគ្នេយ៍ដែលរងផលប៉ះពាល់ខ្លាំងបំផុតដោយវិធានការពាណិជ្ជកម្មរបស់ប្រធានាធិបតីអាមេរិក លោក Donald Trump ជាមួយនឹងពន្ធខ្ពស់ជាងការរំពឹងទុក ៣៦ ភាគរយ។
ខណការផ្អាកយកពន្ធបណ្ដោះអាសន្ន រយៈពេល ៩០ ថ្ងៃរបស់សហរដ្ឋអាមេរិក រដ្ឋមន្ត្រី ថានឹងផ្តល់ពេលវេលាបន្ថែមទៀតដល់មន្ត្រី ដើម្បីរៀបចំផែនការឆ្លើយតប ។
យោងតាម លោក Pichai បានបញ្ជាក់ថា ថៃ ត្រូវការពោតប្រហែល ៩ លានតោន ក្នុងមួយឆ្នាំ ដោយបន្ថែមថា តម្លៃពោតរបស់អាមេរិក ថោកដែលធ្វើឲ្យតម្លៃចំណីសត្វរបស់យើងទាបដូចគ្នា។
ទន្ទឹមនោះ លោក បានលើកឡើងថា ផលប៉ះពាល់នៃបរិមាណនាំចូលនឹងត្រូវវាយតម្លៃជាមុនសិន ហើយអាចនឹងកាត់បន្ថយពន្ធលើផលិតផលកសិកម្មមកត្រឹមសូន្យ និងនាំចូលឧស្ម័នធម្មជាតិបន្ថែមទៀត។
ទោះជាយ៉ាងណា លោក Pichai អះអាងថា យើងនឹងផ្តល់ឲ្យអាមេរិក នូវភាពស្មើគ្នា។ ប្រសិនបើថៃផ្តល់ឱ្យប្រទេសផ្សេង ៥ ភាគរយ នោះយើងផ្តល់ឱ្យអាមេរិក ៥ ភាគរយ។ ប្រសិនបើអ្នកផ្សេងទៀត ០ ភាគរយនោះ យើងផ្តល់ឱ្យអាមេរិក ០ ភាគរយ ដូចគ្នា។
គួរបញ្ជាក់ថា សហរដ្ឋអាមេរិក គឺជាទីផ្សារនាំចេញដ៏ធំបំផុតរបស់ប្រទេសថៃ កាលពីឆ្នាំមុន ដែលមានចំនួន ១៨.៣ ភាគរយនៃការនាំចេញសរុប ឬ ៥៤.៩៦ ពាន់លានដុល្លារ៕
ដោយ៖ ពេជ្រ
