លោកប្រធានាធិបតី Donald Trump បាននិយាយថា សហរដ្ឋអាមេរិក ទាមទារកោះ Greenland គ្រាន់តែដើម្បីធានាសន្តិសុខអន្តរជាតិ នោះទេ។
លោក បានប្រាប់អ្នកយកព័ត៌មាននៅសេតវិមានថា យើងត្រូវការ Greenland ព្រោះវាជាផ្នែកសំខាន់ណាស់ សម្រាប់សន្តិសុខអន្តរជាតិ។
ទន្ទឹមនោះ លោក Trump បានកត់សម្គាល់ថា ប្រសិនបើអ្នកក្រឡេកមើល Greenland ឥឡូវនេះ ប្រសិនបើអ្នកក្រឡេកមើលផ្លូវទឹក កប៉ាល់ចិន និងរុស្ស៊ី នៅពាសពេញកន្លែងនោះ ដោយលោក ថា សហរដ្ឋអាមេរិក មិនពឹងផ្អែកលើប្រទេសដាណឺម៉ាក ឬនរណាម្នាក់ផ្សេងទៀត ដើម្បីគាំពារស្ថានការណ៍នោះ ដោយបន្ថែមថា យើងត្រូវការ Greenland ។
ប្រធានាធិបតីអាមេរិករូបនេះ បានសង្កត់ធ្ងន់ថា យើងមិននិយាយអំពីប្រយោជន៍សម្រាប់សហរដ្ឋអាមេរិកទេ។ យើងកំពុងនិយាយអំពីសន្តិភាពពិភពលោក ។
គួរបញ្ជាក់ថា លោក Trump ធ្លាប់និយាយថា លោក នឹងយល់ព្រមលើការសម្រេចចិត្តរបស់ប្រជាជន Greenland ក្នុងការធ្វើឱ្យទឹកដីស្វយ័តដាណឺម៉ាកនេះជាផ្នែកមួយនៃសហរដ្ឋអាមេរិក។ មេដឹកនាំអាមេរិក ក៏ធ្លាប់ថ្លែងថា Greenland គួរចូលរួមជាមួយអាមេរិក។ លើសពីនេះ លោក បានគំរាមយកពន្ធពាណិជ្ជកម្មខ្ពស់ប្រឆាំងនឹងប្រទេសដាណឺម៉ាក ប្រសិនបើប្រទេសនេះមិនបោះបង់កោះនេះ ៕
ដោយ៖ ពេជ្រ
