ភ្លើងឆេះព្រៃបានឆាបឆេះនៅតំបន់ផ្សេងៗនៃប្រទេសកូរ៉េខាងត្បូងចាប់តាំងពីថ្ងៃសុក្រមក ដោយបានសម្លាប់មនុស្ស៤នាក់ក្នុងនោះមានអ្នកពន្លត់អគ្គិភ័យផងដែរ។
ទីភ្នាក់ងារសារព័ត៌មានយ៉ុនហាប់ ផ្សាយថា អ្នកពន្លត់អគ្គីភ័យដែលបានស្លាប់គឺពួកគេបាន និងកំពុងជួយពន្លត់ភ្លើងនៅក្នុងខេត្ត Gyeongsang ភាគខាងត្បូង ភាគអាគ្នេយ៍របស់ប្រទេស។ ភ្លើងក៏បានបង្ខំប្រជាជនរាប់រយនាក់ត្រូវជម្លៀសចេញពីផ្ទះសម្បែងរបស់ពួកគេផងដែរ។
រដ្ឋាភិបាលកូរ៉េខាងត្បូងបានណែនាំអាជ្ញាធរកាលពីថ្ងៃសៅរ៍ឱ្យខិតខំប្រឹងប្រែងអស់ពីសមត្ថភាពដើម្បីពន្លត់ភ្លើង និងជួយប្រជាជននៅក្នុងខេត្ត South Gyeongsang ខេត្ត Gyeongsang ខាងជើង និងទីក្រុង Ulsan ខណដែលប្រតិបត្តិការពន្លត់អគ្គីភ័យបន្តពេញមួយយប់ដោយមានជំនួយពីឧទ្ធម្ភាគចក្រ។
ប៉ុន្តែប្រព័ន្ធផ្សព្វផ្សាយឲ្យដឹងថា ខ្យល់ស្ងួតនិងខ្យល់បក់ខ្លាំងកំពុងបញ្ឆេះភ្លើងកាន់តែឆេះសន្ធោសន្ធៅ ហើយបានរារាំងដល់កិច្ចខិតខំប្រឹងប្រែងរបស់អ្នកពន្លត់អគ្គីភ័យ៕
ដោយ៖ ពេជ្រ
