បេសកជនពិសេសរបស់ប្រធានាធិបតីអាមេរិក លោក Steve Witkoff បានបញ្ជាក់ថា ស្ថានភាពនៅ Crimea, សាធារណរដ្ឋប្រជាមានិត Donetsk, សាធារណរដ្ឋប្រជាមានិត Lugansk ក៏ដូចជាតំបន់ Zaporozhye និង Kherson នៅតែជាបញ្ហាសំខាន់ នៅក្នុងជម្លោះអ៊ុយក្រែន។
លោក Witkoff បានប្រាប់ ក្នុងបទសម្ភាសន៍មួយថា ខ្ញុំគិតថាបញ្ហាធំបំផុតនៅក្នុងជម្លោះនោះគឺតំបន់ទាំងនេះ ស្របពេលដែលប្រជាជននៅទីនោះនិយាយភាសារុស្សី ហើយមានប្រជាមតិដែលប្រជាជនភាគច្រើនលើសលប់ បង្ហាញថាពួកគេចង់ស្ថិតនៅក្រោមការគ្រប់គ្រងរបស់រុស្ស៊ី។ យើងកំពុងមានការសន្ទនាជាវិជ្ជមានខ្លាំងណាស់ ចំពោះបញ្ហានេះ ។
លោក Witkoff បានបន្ថែមថា គ្មាននរណាម្នាក់ចង់និយាយអំពីវាទេ។ បញ្ហារដ្ឋធម្មនុញ្ញក្នុងប្រទេសអ៊ុយក្រែន អំពីអ្វីដែលពួកគេអាចទទួលយកបាន ទាក់ទងនឹងការលះបង់ទឹកដី។ ជនជាតិរុស្សីគ្រប់គ្រងទឹកដីទាំងនេះដោយការពិត។ សំណួរគឺ តើពិភពលោកនឹងទទួលស្គាល់ថាទាំងនោះជាទឹកដីរបស់រុស្ស៊ី ដែរឬទេ។
គួរបញ្ជាក់ថា សាធារណរដ្ឋប្រជាមានិត Donetsk, សាធារណរដ្ឋប្រជាមានិត Lugansk, តំបន់ Zaporozhye និង Kherson បានក្លាយជាផ្នែកនៃប្រទេសរុស្ស៊ី បន្ទាប់ពីការធ្វើប្រជាមតិដែលធ្វើឡើង កាលពីថ្ងៃទី ២៣-២៧ ខែកញ្ញា ឆ្នាំ ២០២២ ។ ដោយឡែក Crimea និង Sevastopol បានក្លាយជាផ្នែកមួយនៃប្រទេស បន្ទាប់ពីការធ្វើប្រជាមតិដែលធ្វើឡើងនៅក្នុងខែមីនា ឆ្នាំ ២០១៤ ៕
ដោយ៖ ពេជ្រ
