ការប្រកួតដ៏ធំប្រចាំសប្ដាហ៍ទី១៩នៃក្របខណ្ឌលីគកំពូលកម្ពុជា នៅថ្ងៃទី២៦ ខែមករា ឆ្នាំ២០២៥ នៃព្រះខ័នរាជស្វាយរៀង ទទួលស្វាគមន៍ភ្ញៀវភ្នំពេញក្រោន នៅកីឡដ្ឋានខេត្តស្វាយរៀង។
ការជួបគ្នាលើកចុងក្រោយនៅថ្ងៃទី ២០ ខែតុលា ឆ្នាំ ២០២៤ នៅកីឡដ្ឋាន Smart RSN ភ្នំពេញក្រោន បានយកឈ្នះក្នុងលទ្ធផល ៤-៣។ មកដល់សប្តាហ៍នេះ ស្វាយរៀង ប្ដេជ្ញាយក ៣ពិន្ទុមកវិញ នៅមុខអ្នកគាំទ្រម្ចាស់ផ្ទះ។
ក្លឹបភ្នំពេញក្រោនបច្ចុប្បន្នមានទម្រង់លេងមិនគួរឲ្យជឿ ដោយមិនចាញ់ការប្រកួតណាមួយឡើយចាប់តាំងពីដើមរដូវកាលជាមួយនឹងលទ្ធផលនៃការឈ្នះ ១៤ និងស្មើ ២ មានពិន្ទុសរុប៤៤ ពិន្ទុនាំមុខកំពូលតារាង។ ខណៈក្រុមព្រះខ័នរាជស្វាយរៀង ក៏ធ្វើបានល្អដែរ ដោយឈ្នះ ១៣ ស្មើ ១ និងចាញ់ ២ ក្នុងចំណោម១៦ ប្រកួតចុងក្រោយ រកបាន ៤០ ពិន្ទុ ធ្វើឱ្យពួកគេឈរនៅលេខ ៣ ។
ការប្រកួតនេះនឹងពោរពេញទៅដោយភាពរំភើប ខណៈដែលក្រុមទាំងពីរស្រេកឃ្លានស្វែងរក៣ពិន្ទុ។ ការប្រកួតនៅថ្ងៃទី២៦ ខែមករា ឆ្នាំ ២០២៥ នឹងក្លាយជាការប្រកួតដ៏ធំមួយរវាងក្រុមកំពូលតារាងនៃលីគកំពូលកម្ពុជាបច្ចុប្បន្ន គឺព្រះខ័នរាជស្វាយរៀង vs ភ្នំពេញក្រោន នឹងចាប់ផ្តើមនៅម៉ោង ១៨:០០ យប់នៅកីឡដ្ឋានខេត្តស្វាយរៀង៕
