ប្រធានាធិបតីរុស្ស៊ី លោក វ្ល៉ាឌីមៀ ពូទីន និងប្រធានាធិបតីចិន លោក ស៊ី ជីនពីង បានអះអាងជាថ្មីអំពីភាពរឹងមាំនៃភាពជាដៃគូយុទ្ធសាស្ត្ររបស់ប្រទេសទាំងពីរ ទោះត្រូវប្រឈមមុខនឹងសម្ពាធពីខាងក្រៅ។ ភាគីទាំងពីរថែមទាំងបានសន្យាថានឹងពង្រឹងទំនាក់ទំនងបន្ថែមទៀតក្នុងអំឡុងពេលនៃជួបគ្នាតាមវីដេអូកាលពីថ្ងៃអង្គារម្សិលមិញ។
ដោយនិយាយទៅកាន់គ្នាទៅវិញទៅមកក្នុងនាមជា “មិត្តសម្លាញ់” ពូទីន និងស៊ី បានលើកឡើងពីអត្ថប្រយោជន៍នៃភាពជាដៃគូរុស្ស៊ី-ចិន ដែលពួកគេបានសរសើរថាមានឫសគល់ក្នុងការគោរព និងគោលដៅរួមគ្នា។ មេដឹកនាំចិនបានបន្ថែមថា ទីក្រុងប៉េកាំងសង្ឃឹមថានឹងនាំយកទំនាក់ទំនងជាមួយទីក្រុងម៉ូស្គូទៅកាន់កម្រិតថ្មីមួយនៅឆ្នាំ 2025 ដោយឈររួមគ្នា “ប្រឆាំងនឹងភាពមិនប្រាកដប្រជាពីខាងក្រៅដោយផ្អែកលើការរក្សាស្ថិរភាព និងភាពធន់ទ្រាំទៅនឹងភាពតានតឹង”។
លោក Xi ក៏បានសង្កត់ធ្ងន់លើសារៈសំខាន់នៃការរក្សា ប្រព័ន្ធអន្តរជាតិដែលផ្តោតលើអង្គការសហប្រជាជាតិ ហើយការពារជ័យជំនះនៃសង្គ្រាមលោកលើកទី២ និងការការពារ “សិទ្ធិរបស់ចិន និងរុស្ស៊ីក្នុងនាមជាប្រទេសស្ថាបនិករបស់អង្គការសហប្រជាជាតិ និងសមាជិកអចិន្ត្រៃយ៍នៃក្រុមប្រឹក្សាសន្តិសុខ UN។
យោងតាមស្ថិតិជាតិបានឱ្យដឹងថា លោក ពូទីន បានសរសើរកំណើនពាណិជ្ជកម្មរុស្ស៊ីជាមួយចិន ដែលឈានដល់ការប៉ាន់ប្រមាណពី ២២០ ទៅ ២៤៥ ពាន់លានដុល្លារក្នុងឆ្នាំ ២០២៤។ លោកបានកត់សម្គាល់ថា កាលពីឆ្នាំមុន រុស្ស៊ីបានក្លាយជាអ្នកផ្គត់ផ្គង់ឧស្ម័នធម្មជាតិចម្បងដល់ប្រទេសចិន ដោយសារការពង្រីកបំពង់បង្ហូរប្រេងយុទ្ធសាស្ត្រ។ លោកពូទីនបានបន្ថែមថា ទីក្រុងម៉ូស្គូ និងទីក្រុងប៉េកាំងក៏បានព្រមព្រៀងគ្នាផងដែរក្នុងការធ្វើឱ្យស៊ីជម្រៅកិច្ចសហប្រតិបត្តិការរបស់ពួកគេនៅក្នុងថាមពលនុយក្លេអ៊ែរ។
មេដឹកនាំរុស្ស៊ីក៏បានលើកទ្បើងដែរថា “យើងកសាងទំនាក់ទំនងរបស់យើងនៅលើមូលដ្ឋាននៃមិត្តភាព ការជឿទុកចិត្តគ្នា និងការគាំទ្រគ្នាទៅវិញទៅមក សមភាព និងផលប្រយោជន៍ទៅវិញទៅមក”។ លោកថែមទាំងបានពណ៌នាអំពីទំនាក់ទំនងនេះថា “ជាភាពគ្រប់គ្រាន់ដោយពឹងលើខ្លួនឯង និងឯករាជ្យពីកត្តានយោបាយក្នុងស្រុក និងស្ថានភាពពិភពលោកបច្ចុប្បន្ន”។
លោក ពូទីន និងលោក ស៊ី មានជំនួបទល់មុខគ្នាចំនួនបីលើកកាលពីឆ្នាំមុន ដែលធ្វើឡើងនៅទីក្រុងប៉េកាំង អាស្តាណា និងកាហ្សាន។ ពួកគេក៏មានការហៅជាវីដេអូជួបគ្នាជារៀងរាល់ចុងឆ្នាំក្នុងខែមករា ហើយពេលខ្លះនៅក្នុងការប្រារព្ធពិធីចូលឆ្នាំថ្មីនៅក្នុងប្រទេសរៀងៗខ្លួន។
ប្រទេសចិន និងរុស្ស៊ីមានជំហររួមគ្នាលើបញ្ហាសកលជាច្រើន ហើយកំពុងសហការគ្នាដើម្បីជំរុញការផ្លាស់ប្តូរក្នុងរយៈពេលយូរអង្វែងលំដាប់អន្តរជាតិដែលផ្តោតលើលោកខាងលិចឲ្យក្លាយទៅជាប្រព័ន្ធពហុប៉ូល។ អ្នកទាំងពីរប្រកាសថា វិធីសាស្រ្តដែលគេពេញចិត្តបំផុតនោះគឺការបម្រើប្រទេសដែលមិនសូវមានឥទ្ធិពល និងលើកកម្ពស់យុត្តិធម៌ និងសមភាពសកលកាន់តែខ្លាំង៕
ដោយ៖ ពេជ្រ
