យោងតាមក្រុមប្រព័ន្ធផ្សព្វផ្សាយមួយបានឱ្យដឹងថា ការវាយប្រហាររបស់អ៊ីស្រាអែលប្រឆាំងនឹងតំបន់ហ្គាហ្សាស្ទ្រីបក្នុងខែធ្នូបានសម្លាប់អ្នកកាសែតប៉ាឡេស្ទីនចំនួន ១០ នាក់ ។
សម្ព័ន្ធអ្នកកាសែតប៉ាឡេស្ទីនបានឲ្យដឹងកាលពីថ្ងៃសៅរ៍កន្លងទៅនេះថា យោធាអ៊ីស្រាអែលបានប្រព្រឹត្តការរំលោភ និងឧក្រិដ្ឋកម្មចំនួន ៨៤លើក ប្រឆាំងនឹងអ្នកកាសែតប៉ាឡេស្ទីនកាលពីខែមុន។ ប្រភាពនោះបញ្ជាក់ថា អ៊ីស្រាអែលបន្តវិធីសាស្រ្តរបស់ខ្លួន ដើម្បីកំណត់គោលដៅលើអ្នកកាសែតប៉ាឡេស្ទីន រហូតដល់ការប្រព្រឹត្តការសម្លាប់រង្គាលប្រឆាំងនឹងពួកគេថែមទៀត។
គូសបញ្ជាក់ផងដែរថា សមាជិកគ្រួសារអ្នកសារព័ត៌មានចំនួន ៨ នាក់ត្រូវបានសម្លាប់ ផ្ទះរបស់បុគ្គលិកប្រព័ន្ធផ្សព្វផ្សាយចំនួន ៣ នាក់ត្រូវបានបំផ្លាញ និងអ្នកសារព័ត៌មានចំនួន ៥ នាក់បានរងរបួសយ៉ាងធ្ងន់ធ្ងរដោយសារគ្រាប់កាំភ្លើង និងគ្រាប់ទម្លាក់ពីយន្តហោះវាយប្រហាររបស់អ៊ីស្រាអែល។
ក្រុមអ្នកកាសែតបានរាយការណ៍ថា អ្នកកាសែត ២០ នាក់ប្រឈមមុខនឹងការឃុំឃាំង ហើយត្រូវបានរារាំងពីការផ្សាយព្រឹត្តិការណ៍ ខណៈ ៧ នាក់ត្រូវបានជាប់ពន្ធនាគារ។ បន្ថែមពីលើនេះ មានឯកសារចំនួន ១១ ករណីនៃការបាញ់គ្រាប់ពិតទៅលើអ្នកកាសែត។
អ្នកកាសែត ១០ នាក់បានស៊ូទ្រាំនឹងការវាយដំលើរាងកាយយ៉ាងធ្ងន់ធ្ងរ ខណៈដែលករណីចំនួនបីនៃការខូចខាតឧបករណ៍ និងចោរកម្មត្រូវបានរាយការណ៍នៅក្នុង West Bank និង Gaza Strip ហើយសុទ្ធសឹងជាទង្វើរបស់ទាហានអ៊ីស្រាអែល។
សេចក្តីថ្លែងការណ៍មួយកាលពីថ្ងៃទី ៣ ខែមករា ឆ្នាំ២០២៥ ដោយការិយាល័យប្រព័ន្ធផ្សព្វផ្សាយ Gaza បាននិយាយថា ចំនួនអ្នកកាសែតដែលត្រូវបានសម្លាប់នៅក្នុងការវាយប្រហាររបស់កងទ័ពអ៊ីស្រាអែលលើតំបន់ហ្គាហ្សា ចាប់តាំងពីថ្ងៃទី ៧ ខែតុលា ឆ្នាំ ២០២៣ មកបានកើនឡើងដល់ ២០២ នាក់ហើយ។
កងទ័ពអ៊ីស្រាអែលបានបន្តសង្រ្គាមប្រល័យពូជសាសន៍លើតំបន់ហ្គាហ្សា ដែលបានសម្លាប់ជនរងគ្រោះជាង ៤៥,៦០០ នាក់ ដែលភាគច្រើនជាស្ត្រី និងកុមារ ចាប់តាំងពីការវាយប្រហារដោយក្រុមតស៊ូប៉ាឡេស្ទីន ហាម៉ាស កាលពីថ្ងៃទី ៧ ខែតុលា ឆ្នាំ ២០២៣ បើទោះបីជាដំណោះស្រាយរបស់ក្រុមប្រឹក្សាសន្តិសុខអង្គការសហប្រជាជាតិបានអំពាវនាវឲ្យបញ្ឈប់ក៏ដោយ។
តុលាការឧក្រិដ្ឋកម្មអន្តរជាតិ (ICC) បានចេញដីកាចាប់ខ្លួន នៅក្នុងខែវិច្ឆិកា សម្រាប់នាយករដ្ឋមន្ត្រីអ៊ីស្រាអែលលោក Benjamin Netanyahu និងអតីតរដ្ឋមន្ត្រីការពារជាតិរបស់គាត់លោក Yoav Gallant ពីបទឧក្រិដ្ឋកម្មសង្រ្គាម និងឧក្រិដ្ឋកម្មប្រឆាំងមនុស្សជាតិនៅក្នុងតំបន់ Gaza។ អ៊ីស្រាអែលក៏កំពុងប្រឈមមុខនឹងសំណុំរឿងប្រល័យពូជសាសន៍នៅតុលាការយុត្តិធម៌អន្តរជាតិសម្រាប់សកម្មភាពយោធារបស់ខ្លួននៅក្នុងតំបន់ហ្គាហ្សាថែមទៀត៕
ដោយ៖ ពេជ្រ
