រដ្ឋអាជ្ញានៅក្នុងប្រទេសកូរ៉េខាងត្បូងបានចោទប្រកាន់អតីតរដ្ឋមន្ត្រីការពារជាតិលោក Kim Yong-hyun សម្រាប់តួនាទីរបស់គាត់នៅក្នុងការប្រកាសច្បាប់អាជ្ញាសឹករយៈពេលខ្លីរបស់ប្រធានាធិបតីលោក Yoon Suk-yeol ។ លោលត្រូវបានចោទប្រកាន់ពីបទបះបោរ និងរំលោភអំណាច។
លោក Yoon បានដាក់វិធានការនេះនៅថ្ងៃទី ៣ ខែធ្នូ ប៉ុន្តែសមាជិកសភាបានបដិសេធការសម្រេចចិត្តក្នុងសភាប៉ុន្មានម៉ោងក្រោយមក។
រដ្ឋអាជ្ញាបាននិយាយកាលពីថ្ងៃសុក្រថា លោក គីម បានបញ្ជាឱ្យកងទ័ពរារាំងសមាជិកសភាមិនឱ្យចូលក្នុងរដ្ឋសភា។ ពួកគេក៏បានចោទប្រកាន់លោកពីបទបញ្ជាកងទ័ពឱ្យឃុំខ្លួនមន្ត្រីរួមទាំងមេដឹកនាំគណបក្សអំណាចប្រជាជនដែលកំពុងកាន់អំណាចនៅពេលនោះ និងប្រធានគណបក្សប្រឆាំងដ៏ធំបំផុតផងដែរ។
រដ្ឋអាជ្ញានិយាយថា លោក Kim បានបញ្ជាឲ្យទាហានចូលគ្រប់គ្រងគណៈកម្មាធិការជាតិរៀបចំការបោះឆ្នោត។ ពួកគេនិយាយថាលោកYoon,លោក Kim និងមន្ត្រីផ្សេងទៀតបានពិភាក្សាអំពីច្បាប់អាជ្ញាសឹកជាច្រើនដងចាប់តាំងពីខែមីនា មក។ ពួកគេបញ្ជាក់ថា លោក គីម ពិតជាបានចូលរួមក្នុងការរៀបចំ ហើយបានសរសេរអត្ថបទពង្រាងដើម្បីអានដោយលោក Yoon ថែមទៀត ។
រដ្ឋអាជ្ញាបានឲ្យដឹងថា លោក Yoon បានបញ្ជាឱ្យមេបញ្ជាការយោធាបន្តដាក់ពង្រាយកងទ័ពនៅជុំវិញសភា ទោះបីជាសមាជិកសភាបានបោះឆ្នោតលុបចោលច្បាប់អាជ្ញាសឹកក៏ដោយ៕
ដោយ៖ ពេជ្រ
