Valencia ដែលលេងនៅលីគកំពូលអេស្ប៉ាញ La Liga បានសម្រេចតែងតាំងលោក Carlos Corberan ជាអ្នកចាត់ការទូទៅរបស់ពួកគេ ក្រោមកិច្ចសន្យាដល់បំណាច់រដូវកាលឆ្នាំ២០២៦-២៧ ក្នុងការជំនួសតំណែងលោក Ruben Baraja ដែលត្រូវបញ្ចប់តួនាទីកាលពីដើមសប្តាហ៍នេះ។
Valencia បានព្រមព្រៀងបង់ប្រាក់ប្រមាណពី ៣-៤លានផោន ក្នុងការផ្តាច់កិច្ចសន្យារបស់បុរសវ័យ ៤១ឆ្នាំ ពីក្លិបអង់គ្លេស West Bromwich Albion លេងនៅ Championship ក្នុងក្របខណ្ឌទី២ អង់គ្លេសបច្ចុប្បន្ន។ លោក Corberan មានស្ថិតិដឹកនាំក្លិប West Brom ឈ្នះបាន ៤៧ប្រកួត ក្នុងចំណោម ១០៧ប្រកួតសរុបគិតចាប់តាំងពីឆ្នាំ២០២២ មក។
Valencia ដែលជាក្លិបមានមូលដ្ឋាននៅទីក្រុងកំណើតរបស់លោក Corberan បានកំពុងឈរនៅលេខរៀងទី២ រាប់ពីក្រោម និងដាច់ ៤ពិន្ទុផងដែរពីតំបន់មានសុវត្ថិភាព។ ពួកគេត្រូវប៉ះក្រុមការពារតំណែងជើងឯក La Liga គឺ Real Madrid ក្នុងការប្រកួតលីគរបស់ពួកគេនាថ្ងៃទី០៣ ខែមករា ឆ្នាំ២០២៤៕
