មេធាវីស្និទ្ធនឹងប្រធានាធិបតីកូរ៉េខាងត្បូងលោក Yoon Suk-yeol បានឲ្យដឹងថា លោកប្រធានាធិបតី Yoon ទំនងជាមិនបង្ហាញខ្លួនសម្រាប់ការកោះហៅមកសាកសួរនៅថ្ងៃពុធ នេះដូចដែលបានស្នើសុំដោយក្រុមស៊ើបអង្កេតរួមគ្នារបស់អាជ្ញាធរនោះទេ។
ក្រុមស៊ើបអង្កេត រួមទាំងប៉ូលីសកំពុងស្វែងរកការសាកសួរលោកYoon លើការចោទប្រកាន់ពីបទបះបោរ និងការរំលោភបំពានអំណាច។ តុលាការបានបញ្ជូនដីការកោះហៅជាលើកទីពីរដែលស្នើសុំឲ្យលោកYoon បង្ហាញខ្លួននៅតុលាការដើម្បីសាកសួរនៅម៉ោង 10 ព្រឹកថ្ងៃពុធនេះ។
មេធាវីដែលបានស្គាល់លោក Yoon អស់រយៈពេល 40 ឆ្នាំមកហើយ និងពាក់ព័ន្ធនឹងការជ្រើសរើសក្រុមមេធាវីការពារក្តីរបស់ប្រធានាធិបតីបាននិយាយទៅកាន់អ្នកសារព័ត៌មានកាលពីថ្ងៃអង្គារ ខណដែលលោកបាននិយាយថា វាហាក់ដូចជាមិនទំនងដែលលោក Yoon នឹងអាចចូលទៅតុលាការនៅថ្ងៃពុធនេះទេ។ លោកបានលើកឡើងថា ជាហេតុផលនោះគឺលក្ខខណ្ឌមួយចំនួនមិនត្រូវបានបំពេញនៅទ្បើយសម្រាប់លោក Yoon។
មេធាវីរូបនោះក៏បាននិយាយថា លោក Yoon ផ្តល់អាទិភាពលើដំណើរការកាត់ក្តីចោទប្រកាន់របស់តុលាការធម្មនុញ្ញ ដែលត្រូវបានរំពឹងថានឹងចាប់ផ្តើមនៅថ្ងៃសុក្រ។ លោក Yoon មិនបានអនុវត្តតាមដីកាកោះហៅដំបូងរបស់ក្រុមស៊ើបអង្កេតរួមដែលស្នើឱ្យគាត់ចូលខ្លួនដើម្បីសាកសួរនៅថ្ងៃទី ១៨ ខែធ្នូ នោះទេ។
ប្រព័ន្ធផ្សព្វផ្សាយកូរ៉េខាងត្បូង បាននិយាយថា ក្រុមនេះគ្រោងនឹងពិចារណាលើការដាក់ពាក្យសុំដីការបស់តុលាការ ដើម្បីឃុំខ្លួនលោកYoon ប្រសិនបើគាត់មិនគោរពតាមការកោះហៅចុងក្រោយនេះ៕
ដោយ៖ ពេជ្រ
