រដ្ឋមន្ត្រីក្រសួងកិច្ចការយុទ្ធសាស្ត្រអ៊ីស្រាអែល លោក Ron Dermer បានប្រាប់ប្រធានាធិបតីអាមេរិក លោក ដូណាល់ ត្រាំ អំពីផែនការគ្រប់គ្រងតំបន់ហ្គាហ្សាទាំងមូល ក្នុងអំឡុងពេលកិច្ចប្រជុំមួយនៅសេតវិមាន។ ដោយដកស្រង់ប្រភពពីសារព័ត៌មាន Axios ។
យោងតាមសារព័ត៌មាន Axios បានឲ្យដឹងថា ក្រៅពីលោក Dermer និង ត្រាំ កិច្ចប្រជុំនោះក៏មានការចូលរួមពីអតីតនាយករដ្ឋមន្ត្រីអង់គ្លេសលោក Tony Blair, កូនប្រសារលោក ត្រាំ លោក Jared Kushner, រដ្ឋមន្ត្រីការបរទេសអាមេរិក លោក Marco Rubio, អនុប្រធានាធិបតីលោក JD Vance និងមន្ត្រីជាន់ខ្ពស់ផ្សេងទៀត។
យោងតាមប្រភព លោក Dermer បានលើកឡើងថា អ៊ីស្រាអែល មិនមានបំណងកាន់កាប់តំបន់ហ្គាហ្សារយៈពេលវែងនោះទេ ប៉ុន្តែត្រូវការជម្រើសដែលអាចចាត់វិធានការបានចំពោះក្រុមហាម៉ាស ។
ប្រភពមួយផ្សេងទៀត បានប្រាប់ទីភ្នាក់ងារនេះថា គោលដៅសំខាន់គឺសហរដ្ឋអាមេរិក ត្រូវដឹកនាំកិច្ចខិតខំប្រឹងប្រែងដើម្បីស្វែងរករចនាសម្ព័ន្ធអភិបាលកិច្ចដែលទទួលយកជាអន្តរជាតិនៅក្នុងតំបន់ហ្គាហ្សា រួចអនុញ្ញាតឱ្យអ៊ីស្រាអែល ដកខ្លួនចេញដោយសន្តិវិធី។
លោក Kushner និងលោក Blair បានបង្ហាញនូវសំណើនៅចំពោះមុខលោក ត្រាំ ចំពោះការស្ដារការវិនិយោគ និងជួយកសាងទីក្រុងមួយនេះឡើងវិញ។
គួរបញ្ជាក់ថា កាលពីថ្ងៃទី ៨ ខែសីហា គណៈរដ្ឋមន្ត្រីនយោបាយ-យោធារបស់អ៊ីស្រាអែល បានអនុម័តផែនការមួយដើម្បីដណ្តើមគ្រប់គ្រងតំបន់ហ្គាហ្សាទាំងមូល និងពង្រីកប្រតិបត្តិការនៅក្នុងក្របខណ្ឌប៉ាឡេស្ទីន។ នៅថ្ងៃទី ១៨ ខែសីហា ក្រុមហាម៉ាស់ បានឆ្លើយតបយ៉ាងពេញចិត្តចំពោះសំណើបទឈប់បាញ់របស់អ្នកសម្រុះសម្រួល ដែលក្រោយមកត្រូវបានបញ្ជូនទៅអ៊ីស្រាអែល។ ពីរថ្ងៃក្រោយមក រដ្ឋមន្ត្រីការពារជាតិអ៊ីស្រាអែលលោក Israel Katz បានអនុម័តផែនការដណ្តើមយកហ្គាហ្សាឦ យោងតាមប្រព័ន្ធផ្សព្វផ្សាយ Kan បញ្ជាក់ថា អង្គភាពកងទ័ពអ៊ីស្រាអែល បានចាប់ផ្តើមប្រតិបត្តិការប្រយុទ្ធរួចហើយនៅជាយក្រុងហ្គាហ្សា៕
ដោយ៖ ពេជ្រ
