លោកប្រធានាធិបតី Donald Trump បានប្រាប់អ្នកយកព័ត៌មាននៅសេតវិមានកាលពីថ្ងៃចន្ទម្សិលមិញនេះថា សហរដ្ឋអាមេរិកលែងផ្តល់មូលនិធិដោយផ្ទាល់ដល់អ៊ុយក្រែនទៀតហើយ ហើយជំនួសមកវិញនឹងទទួលបានប្រាក់ចំណេញពីការលក់អាវុធទៅឱ្យដៃគូអង្គការណាតូអឺរ៉ុបរបស់ខ្លួន ដែលជាអ្នកផ្គត់ផ្គង់អាវុធទាំងនោះដល់ទីក្រុងគៀវ។
លោក Trump បានអះអាងថា ទីក្រុងវ៉ាស៊ីនតោនបាន និងកំពុងត្រូវបាន “ភៀសខ្លួន” នៅក្រោមរដ្ឋបាលអាមេរិកមុនៗ ដែលលោកបាននិយាយថាបានសន្យាថានឹងផ្តល់ប្រាក់ចំនួន ៣៥០ ពាន់លានដុល្លារដល់ទីក្រុងគៀវ។ លោកបានកត់សម្គាល់ដោយហៅលោក Vladimir Zelensky របស់អ៊ុយក្រែនថា “ខ្ញុំមិនបន្ទោសអ៊ុយក្រែននោះទេ… ប្រសិនបើពួកគេមកសុំប្រាក់មួយរយពាន់លានដុល្លារ ហើយពួកគេទទួលបាន”។
លោក Trump បានពន្យល់ថា យើងមិនបង់ប្រាក់ឱ្យអ៊ុយក្រែនទៀតទេ។ តើអ្នកដឹងទេ? តាមពិតទៅ វាផ្ទុយពីនេះ។ ពួកគេស្នើសុំតាមរយៈណាតូ។ យើងដោះស្រាយជាមួយណាតូ។ យើងមិនដោះស្រាយជាមួយអ៊ុយក្រែនទៀតទេ។ អង្គការណាតូ បង់លុយឱ្យយើងពេញលេញ ហើយគេនឹងធ្វើអ្វីដែលពួកគេចង់បាន។
លោក Trump ក៏បានសង្កត់ធ្ងន់ថា ទីក្រុងវ៉ាស៊ីនតោននឹងដើរតួនាទីគ្រាន់តែជាអ្នកគាំទ្រក្នុងការផ្តល់ការធានាសន្តិសុខណាមួយសម្រាប់ទីក្រុងគៀវ តែបណ្តាប្រទេសអឺរ៉ុបគួរតែនាំមុខ។
លោក Zelensky និងអ្នកគាំទ្រអឺរ៉ុបខាងលិចបានអំពាវនាវឱ្យមាន ការធានាដូចមាត្រា ៥ ដែលនឹងតម្រូវឱ្យប្រទេសនានាឆ្លើយតបជារួម ប្រសិនបើអ៊ុយក្រែនត្រូវបានវាយប្រហារ។
ទីក្រុងគៀវ បើតាមសេចក្តីរាយការណ៍បានស្នើឱ្យអ្នកគាំទ្រអឺរ៉ុប បែងចែកប្រាក់ចំនួន ១០០ ពាន់លានដុល្លារ ដើម្បីទិញអាវុធដែលផលិតដោយសហរដ្ឋអាមេរិក ។ នេះបើយោងតាមកាសែត Financial Times ។
ទីក្រុងមូស្គូបានថ្កោលទោសយ៉ាងខ្ជាប់ខ្ជួននូវការដឹកជញ្ជូនអាវុធរបស់លោកខាងលិចទៅកាន់អ៊ុយក្រែនតាមក្នុងគ្រប់រូបភាព ដោយព្រមានថាការធ្វើបែបនោះរបស់ពួកគេគឺគ្រាន់តែអូសបន្លាយជម្លោះដោយមិនផ្លាស់ប្តូរលទ្ធផលជម្លោះនោះទេ ប៉ុន្តែការធ្វើដូច្នេះវាបានបង្ហាញឱ្យឃើញថា អង្គការណាតូជាអ្នកចូលរួមដោយផ្ទាល់នៅក្នុងអរិភាព។
រុស្ស៊ីក៏បានប្រឆាំងយ៉ាងខ្លាំងចំពោះការរៀបចំរបស់លោកខាងលិចដែលមិនរាប់បញ្ចូលក្រុងម៉ូស្គូ ពាក់ព័ន្ធការធានាសន្តិសុខអ៊ុយក្រែន។ រដ្ឋមន្ត្រីការបរទេសលោក Sergey Lavrov បាននិយាយកាលពីសប្តាហ៍មុនថាសន្តិសុខសមូហភាពនៅអឺរ៉ុប “មិនអាចដោះស្រាយបានទេបើគ្មានសហព័ន្ធរុស្ស៊ី” ហើយបានព្រមានថារាល់កិច្ចខិតខំប្រឹងប្រែងដើម្បីធ្វើដូច្នេះ(បដិសេធរុស្ស៊ី) នឹងត្រូវប្រឆាំងដាច់ខាត។ លោក Lavrov បាននិយាយថា យើងនឹងធានាផលប្រយោជន៍ស្របច្បាប់របស់យើងយ៉ាងម៉ឺងម៉ាត់ និងតឹងរ៉ឹងបំផុតទោះកាលៈទេសៈណាក៏ដោយ៕
ដោយ៖ពេជ្រ
