បន្ទាយមានជ័យ៖គ្រួសាររងគ្រោះដោយធម្មជាតិខ្យល់កន្ត្រាក់ ចំនួន១៤គ្រួសារ ស្ថិតនៅក្នុងឃុំគោករមៀត ស្រុកថ្មពួកខេត្តបន្ទាយមានជ័យ ត្រូវបានសាខាកាកបាទក្រហមខេត្ត នាំយកនូវអំណោយមនុស្សធម៌ នាព្រឹកថ្ងៃ១៣ខែសីហា ឆ្នាំ២០២៥ ដោយក្នុងមួយគ្រួសារទទួលបាននូវអង្ករ ២៥គីឡូក្រាម មីមួយកេស ត្រីខមួយយួរ ទឹកស៊ីអ៊ីវមួយយួរ ទឹកត្រីមួយយួរមុងមួយ ភួយមួយ ក្រមាមួយ និងថវិកាមួយចំនួន។
លោក បឹង គឹមសឹង អនុប្រធានគណៈកម្មការសាខាកាកបាទក្រហមខេត្ត តំណាងឯកឧត្តម អ៊ុ រាត្រីប្រធានគណៈកម្មាធិកា សាខាបានមានប្រសាសន៍ផ្តាំផ្ញើសាកសួរសុខទុក្ខពីសំណាក់សម្តេចកិត្តិព្រឹទ្ធបណ្ឌិត ប៊ុនរ៉ានី ហ៊ុនសែនប្រធានកាកបាទក្រហមកម្ពុជា ដែលជានិច្ចកាល សម្ដេចតែងតែគិតគូរពីសុខទុក្ខពីការលំបាករបស់បងប្អូនប្រជាពលរដ្ឋជានិច្ច មិនថាជិតឬឆ្ងាយក្ដី ។
លោក បឹង គឹមសឹង បានមានប្រសាសន៍បន្តថា ទីណាមានបងប្អូនជួបការលំបាក ទីនោះមានកាកបាទក្រហមចុះជួយជានិច្ច ពិសេសបានផ្តល់នូវអំណោយមនុស្សធម៌ដើម្បី ជាការជួយសម្រាលទុក្ខលំបាកខាងជីវភាពបានមួយគ្រា។ ជាមួយគ្នានោះ កាកបាទក្រហមកម្ពុជា ត្រូវតែលើកកម្ពស់ស្មារតីក្នុងការអនុវត្ត ការងារនានា ដែលត្រូវឆ្លើយតបជាចាំបាច់ ទៅនឹងផលប៉ះពាល់ពីការប្រែប្រួលអាកាសធាតុពិសេស សម្ពាធនៃការកើនឡើងនៃកម្ដៅ ខ្យល់កន្ត្រាក់ មានច្រើន ដែលបង្កឲ្យមានផលប៉ះពាល់ពីធម្មជាតិ ចំពោះបងប្អូនប្រជាពលរដ្ឋ។
ចុងក្រោយ លោកបានធ្វើការផ្ដាំផ្ញើដល់បងប្អូនប្រជាពលរដ្ឋទាំងអស់ ត្រូវមានការប្រុងប្រយ័ត្នឲ្យបានខ្ពស់ បេីមេឃ រកកល្ប ចង់ភ្លៀងឬផ្គររន្ទះត្រូវរកទីទួលសុវត្ថិភាព នឹងសូមចូលរួមអនាម័យបរិស្ថាន ហូបស្អាតផឹកស្អាត រស់នៅស្អាតនិងមានសុខភាពល្អ៕
