មន្ត្រីរដ្ឋាភិបាល បាននិយាយថា គ្រោះទឹកជំនន់ដែលបង្កឡើងដោយភ្លៀងធ្លាក់ខ្លាំងនៅក្នុងប្រទេសនេប៉ាល់ នៅថ្ងៃអង្គារនេះ បានផ្ដាច់ជីវិតមនុស្សម្នាក់ ខណៈ ១៧ នាក់ផ្សេងទៀតបាត់ខ្លួន និងកម្ទេចស្ពានព្រំដែនដ៏សំខាន់ជាមួយប្រទេសចិន។
លោក Arjun Paudel ប្រធានមន្ត្រីស្រុក Rasuwagadi បានឲ្យដឹងថា មនុស្សម្នាក់ រកឃើញថាស្លាប់ និង ១៧ នាក់ផ្សេងទៀត កំពុងបាត់ខ្លួន មកទល់ពេលនេះ។
ទឹកជំនន់នេះ បានបំផ្លាញស្ពានមិត្តភាពនៅស្រុក Rasuwagadi ដែលមានចម្ងាយ ១២០ គីឡូម៉ែត្រភាគខាងជើងនៃរដ្ឋធានី Kathmandu ។
ទន្ទឹមនោះផ្ទះសម្បែង និងរថយន្តជាច្រើនគ្រឿង ដែលចតនៅព្រំដែនត្រៀមត្រួតពិនិត្យគយ ក៏រងការខូចខាតផងដែរ។ រថយន្តអគ្គិសនីរាប់រយគ្រឿងដែលនាំចូលពីប្រទេសចិន ក៏ត្រូវបានរាំងស្ទះ នៅចំណុចព្រំដែនផងដែរ។
អាជ្ញាធរជាតិគ្រប់គ្រង និងកាត់បន្ថយហានិភ័យគ្រោះមហន្តរាយ បានបញ្ជាក់ថា ជនជាតិនេប៉ាល់ ១១នាក់ និងជនជាតិចិន ៦នាក់ ស្ថិតក្នុងចំណោមអ្នកបាត់ខ្លួន។
យោងតាមប៉ូលិស បាននិយាយថា ភ្នាក់ងារជួយសង្គ្រោះចំនួន ៩៥ នាក់ កំពុងដាក់ពង្រាយក្នុងកិច្ចខិតខំប្រឹងប្រែងជួយសង្គ្រោះ ដើម្បីបន្តស្វែងរកជនរងគ្រោះក្នុងហេតុការណ៍នេះ៕
ដោយ៖ ពេជ្រ
