ទីក្រុងតេអេរ៉ង់ បានចោទប្រកាន់ទីក្រុងវ៉ាស៊ីនតោន ពីបទរំលោភច្បាប់អន្តរជាតិ និងសន្ធិសញ្ញាមិនរីកសាយភាយអាវុធនុយក្លេអ៊ែរ បន្ទាប់ពីយោធាអាមេរិ ចូលរួមជាមួយកងកម្លាំងអ៊ីស្រាអែលក្នុងយុទ្ធនាការវាយប្រហារតាមអាកាសប្រឆាំងនឹងទីតាំងនុយក្លេអ៊ែរ និងយោធាអ៊ីរ៉ង់។
លោកប្រធានាធិបតី Trump បានប្រកាសពីការវាយប្រហារលើកដំបូងរបស់សហរដ្ឋអាមេរិក កាលពីយប់ថ្ងៃសៅរ៍ ដោយអះអាងពីការទម្លាក់គ្រាប់លើទីតាំងនុយក្លេអ៊ែរអ៊ីរ៉ង់ ៣ កន្លែង។
ទន្ទឹមនោះ មេដឹកនាំអាមេរិករូបនេះ បានជំរុញឱ្យទីក្រុងតេអេរ៉ង់កុំសងសឹក និងចូលរួមក្នុងកិច្ចចរចា ដោយអះអាងថា សន្តិភាពគឺសំខាន់។
ជាមួយគ្នានោះ រដ្ឋមន្ត្រីការបរទេសអ៊ីរ៉ង់ លោក Seyed Abbas Araghchi បានថ្កោលទោសការវាយប្រហារតាមអាកាសរបស់សហរដ្ឋអាមេរិកថាជាការរំលោភលើសន្ធិសញ្ញាអន្តរជាតិទាំងអស់ ដោយបញ្ជាក់ថា អ៊ីរ៉ង់ នឹងរក្សាជម្រើសទាំងអស់ដើម្បីការពារអធិបតេយ្យភាព ផលប្រយោជន៍ និងប្រជាជនខ្លួន។
កន្លងមក ទីក្រុងតេអេរ៉ង់ បានព្រមានក្រុងវ៉ាស៊ីនតោន និងភាគីទីបីផ្សេងទៀត ប្រឆាំងនឹងការចូលរួមក្នុងជម្លោះដែលកំពុងកើតមានជាមួយអ៊ីស្រាអែល ដោយគំរាមកំណត់គោលដៅលើទ្រព្យសម្បត្តិអរិភាព និងការដឹកជញ្ជូនអាវុធសម្រាប់អ៊ីស្រាអែល។ អ្នកនាំពាក្យក្រុមឧទ្ទាម Houthis របស់យេម៉ែនក៏បានព្រមានដែរថា ប្រសិនបើអាមេរិក ចូលរួម ក្រុមនេះនឹងកំណត់គោលដៅលើនាវាចម្បាំងទាំងអស់នៅសមុទ្រក្រហម៕
ដោយ៖ ពេជ្រ
