ទូរទស្សន៍រដ្ឋប៉ាគីស្ថានបានរាយការណ៍កាលពីថ្ងៃសុក្រថា យ៉ាងហោចណាស់មនុស្ស ៥ នាក់បានស្លាប់ និង ១៤ នាក់ទៀតរងរបួសនៅក្នុងការបាញ់ប្រហារឆ្លងកាត់ខ្សែបន្ទាត់គ្រប់គ្រង (LoC) ក្នុងតំបន់កាស្មៀរគ្រប់គ្រងដោយប៉ាគីស្ថាន ខណដែលកងកម្លាំងសន្តិសុខប៉ាគីស្ថានបានបាញ់ទម្លាក់យន្តហោះគ្មានមនុស្សបើកចំនួន ៤៨ គ្រឿងបន្ថែមទៀតនៅក្នុងការវាយប្រហារពេញមួយយប់។
ប្រព័ន្ធផ្សព្វផ្សាយបានរាយការណ៍ថា មនុស្ស ៥ នាក់ រួមទាំងស្ត្រី និងក្មេងប្រុសម្នាក់ត្រូវបានសម្លាប់ និង ១៤ នាក់ផ្សេងទៀតបានរងរបួសកាលពីយប់ថ្ងៃព្រហស្បតិ៍ ក្នុងអំឡុងពេលការបាញ់ប្រហារដោយអចេតនារបស់ឥណ្ឌា សំដៅទៅលើប្រជាជនស៊ីវិល នៅតាមបណ្តោយ LoC នេះ ទូរទស្សន៍បានរាយការណ៍ដោយដកស្រង់សម្តីមន្ត្រីប៉ូលីសជាន់ខ្ពស់នៅក្នុងស្រុក Kotli និង Bagh ក្នុងតំបន់ Kashmir ដែលគ្រប់គ្រងដោយប៉ាគីស្ថាន។
មិនមានប្រតិកម្មភ្លាមៗពីភាគីឥណ្ឌាចំពោះអ្នកស្លាប់ និងរបួសចុងក្រោយនេះទេ ដោយសារការផ្ទៀងផ្ទាត់ឯករាជ្យចំពេលមានការប៉ះទង្គិចគ្នាដោយអាវុធឥតឈប់ឈររវាងកងទ័ពនៃប្រទេសទាំងពីរជាមួយនឹងអាវុធធុនធ្ងន់គឺពិបាកនឹងស្វែងរកប្រភពពិត។
ខ្សែបន្ទាត់នៃការគ្រប់គ្រង (LoC) គឺជាព្រំដែនជាក់ស្តែងដែលបែងចែកទឹកដីជម្លោះ Jammu និង Kashmir រវាងឥណ្ឌា និងប៉ាគីស្ថាន។
យោងតាមទិន្នន័យដែលចែករំលែកដោយមន្ត្រីប៉ាគីស្ថាន ចំនួនអ្នកស្លាប់ដែលបណ្តាលមកពីការវាយប្រហារដោយមីស៊ីលរបស់ប្រទេសឥណ្ឌា ការបាញ់ឆ្លងព្រំដែន និងការវាយប្រហារដោយយន្តហោះគ្មានមនុស្សបើកបានកើនឡើងដល់ ៣៩ នាក់ហើយនៅក្នុងប្រទេសប៉ាគីស្ថាន និងតំបន់ Kashmir ដែលគ្រប់គ្រងដោយប៉ាគីស្ថានចាប់តាំងពីទីក្រុងញូវដែលីបានប្រកាស ប្រតិបត្តិការ Sindoor កាលពីយប់ថ្ងៃអង្គារ ខណដែលឥណ្ឌាបានអះអាងថាបានវាយប្រហារ ហេដ្ឋារចនាសម្ព័ន្ធភេរវករនៅទីតាំងចំនួនប្រាំបួន នៅខាងក្នុងប្រទេសជិតខាងភាគខាងលិច។ មន្ត្រីប៉ាគីស្ថានក៏បានរាយការណ៍ថាមានអ្នករបួសយ៉ាងតិច ៧៥ នាក់ផងដែរ។ ពួកគេបានបន្ថែមថា យន្តហោះគ្មានមនុស្សបើក Harop ផលិតដោយអ៊ីស្រាអែល បាននិងកំពុងវាយលុកដែនអាកាសប៉ាគីស្ថាន ចាប់តាំងពីយប់ថ្ងៃពុធ។
រដ្ឋមន្ត្រីការពារជាតិប៉ាគីស្ថាន Khawaja Asif បានប្រាប់សភាក្នុងទីក្រុង Islamabad ថា ការវាយប្រហារដោយយន្តហោះគ្មានមនុស្សបើករបស់ឥណ្ឌាគឺ សំដៅស្វែងរកទីតាំងនៅខាងក្នុង ប្រទេសដែលមានប្រជាជនប្រមាណ ២៥០ លាននាក់។
លោកបាននិយាយកាលពីថ្ងៃសុក្រថា សកម្មភាពនេះជាមូលហេតុដែលដ្រូនមិនត្រូវបានស្ទាក់ចាប់ ដើម្បីកុំឱ្យទីតាំងរបស់យើងមានគ្រោះមហន្តរាយ ប៉ុន្តែនៅពេលដែលយន្តហោះគ្មានមនុស្សបើក ស្ថិតនៅក្នុងដែនកំណត់សុវត្ថិភាព យើងបានបាញ់ទម្លាក់ពួកគេភ្លាមៗតែម្តង។
យោងតាមក្រសួងការពារជាតិឥណ្ឌា យ៉ាងហោចណាស់មនុស្ស ១៦នាក់ត្រូវបានសម្លាប់នៅតាមបណ្តោយ LoC ក្នុងតំបន់កាស្មៀរគ្រប់គ្រងដោយឥណ្ឌា។
ចំពេលមានភាពតានតឹងដែលកំពុងកើតមាន ប្រធានបព្វជិតតំបន់កាស្មៀរ លោក Mirwaiz Umar Farooq បានជំរុញឱ្យឥណ្ឌា និងប៉ាគីស្ថាន បន្ធូរបន្ថយជាបន្ទាន់ និងកុំឱ្យដើរលើផ្លូវដ៏គ្រោះថ្នាក់នេះ ដែលអាចនាំទៅរកការបំផ្លិចបំផ្លាញំកាន់តែធ្ងន់ធ្ងរ៕
ដោយ៖ ពេជ្រ
