ថ្លែងក្រោយទទួលបានជ័យជម្នះដ៏អស្ចារ្យលើក្រុមខ្លាំងឥណ្ឌូនេស៊ី Madura United កាលពីយប់មិញលោក Pep Munoz គ្រូបង្វឹកក្រុមព្រះខ័នរាជស្វាយរៀង បាននិយាយថា«វាគឺជាការបង្ហាញទម្រង់លេងដ៏ល្អមួយសម្រាប់ពួកយើង ហើយក៏ទៅតាមគម្រោងផងដែរ។ យើងព្យាយាមក្នុងការគ្រប់គ្រងបាល់ និងបង្ហាញនៅភាពក្លាហាន។ យើងធ្វើវាបាន និងលេងបានយ៉ាងល្អនៅវគ្គទី ១។
គ្រូបង្វឹកសញ្ជាតិអេស្ប៉ាញរូបនេះបានបន្តថា នៅវគ្គទី ២ យើងបានក៏បានបង្កើតឳកាសមួយចំនួនផងដែរ ជាមួយនឹងការគ្រប់គ្រងបាល់បានល្អពីមួយចំហៀងទៅមួយចំហៀងទៀត។ ខ្ញុំរីករាយណាស់ យើងបានធ្វើវាសម្រាប់អ្នកគាំទ្រ នេះគឺជាការប្រកួតដែលគួរឲ្យចងចាំមួយនៅទីនេះ។»
សូមជម្រាបថា ក្រុមព្រះខ័នរាជស្វាយរៀង បានយកឈ្នះក្រុមខ្លាំងឥណ្ឌូនេស៊ី Madura United ដោយលទ្ធផល ៣-០ ក្នុងជំនួបជើងទី១ នៃវគ្គ ៤ក្រុមចុងក្រោយ ក្នុងព្រឹត្តិការណ៍បាល់ទាត់ AFC Challenge League 2024/2025 នៅពហុកីឡដ្ឋានជាតិមរតកតេជោ ។ ៣គ្រាប់របស់ក្រុមម្ចាស់ផ្ទះស្វាយរៀង រកបានដោយកីឡាករ Breninho នៅនាទីទី៣ កីឡាករ Bounphachan Bounkong នៅនាទីទី៦ និងកីឡាករ មិន រតនៈ បន្ថែមគ្រាប់ទី៣ នៅនាទី៩០ មុនអាជ្ញាកណ្ដាលផ្លុំកញ្ចែបញ្ចប់ការប្រកួត។
ជ័យជម្នះនេះ គឺជាដើមទុនដ៏សំខាន់របស់ក្រុមព្រះខ័នរាជស្វាយរៀង សម្រាប់ជំនួបកាត់សេចក្ដីជើងទី២ ដែលពួកគេត្រូវធ្វើដំណើរទៅលេងនៅទឹកដីរបស់ក្រុម Madura United នៃប្រទេសឥណ្ឌូនេស៊ីវិញម្ដង នាថ្ងៃទី១៧ ខែមេសា ឆ្នាំ២០២៥ ខាងមុខ ដើម្បីកាត់សេចក្ដីរកក្រុមឡើងទៅវគ្គផ្ដាច់ព្រ័ត្រ នៃពានរង្វាន់កម្រិតទី៣ ប្រចាំទ្វីបអាស៊ីនេះ៕
