ទាហានអាមេរិកចំនួន ៣នាក់ត្រូវបានគេរកឃើញថាបានស្លាប់នៅក្នុងប្រទេសលីទុយអានី បន្ទាប់ពីរថពាសដែករបស់ពួកគេត្រូវបានស្រង់ចេញពីវាលភក់ ខណៈកិច្ចខិតខំប្រឹងប្រែងស្វែងរកនៅតែបន្តសម្រាប់ទាហានដែលបាត់ខ្លួនទីបួនម្នាក់ទៀត។ នេះបើយោងតាមការឲ្យដឹងពីកងទ័ពអាមេរិកអឺរ៉ុប និងអាហ្រ្វិកបានកាលពីថ្ងៃចន្ទ។
ទាហានដែលត្រូវបានចាត់តាំងឱ្យទៅក្រុមប្រយុទ្ធរថពាសដែកទី ១ កងពលធំថ្មើរជើងទី ៣ បានបាត់ខ្លួនកាលពីថ្ងៃទី ២៥ ខែមីនា ខណៈពេលដែលព្យាយាមអូសយានយុទ្ធវិធីដែលមិនអាចចល័តបាន។ រថយន្ត M88A2 Hercules របស់ពួកគេត្រូវបានរកឃើញលិចទឹកនៅថ្ងៃបន្ទាប់។ កិច្ចខិតខំប្រឹងប្រែងស្វែងរកចម្រុះជាតិសាសន៍ដែលដឹកនាំដោយអាជ្ញាធរលីទុយអានី និងកងកម្លាំងសហរដ្ឋអាមេរិកនៅតែដំណើរការនៅក្នុងតំបន់នេះ។
កិច្ចខិតខំប្រឹងប្រែងស្វែងរកចម្រុះជាតិសាសន៍ដែលចូលរួមដោយកងកម្លាំងសហរដ្ឋអាមេរិក លីទុយអានី និងប៉ូឡូញ រួមជាមួយនឹងអ្នកមុជទឹកនៃកងទ័ពជើងទឹកសហរដ្ឋអាមេរិក បានយករថយន្តទម្ងន់ ៦៣តោនចេញពីទីតាំងមិនស្ថិតស្ថេរមួយ។
ឧត្តមសេនីយ Christopher Norrie មេបញ្ជាការកងពលធំថ្មើរជើងទី ៣ បាននិយាយថា ការស្វែងរកមិនត្រូវបានបញ្ចប់ទេ រហូតដល់មនុស្សគ្រប់គ្នាបានវិលត្រទ្បប់ទៅផ្ទះវិញ។
លោកបានបន្ថែមថា យើងសម្តែងនូវទុក្ខសោកជាមួយក្រុមគ្រួសារ និងមនុស្សជាទីស្រឡាញ់នៃ ‘Dogface Soldiers’ ដ៏អស្ចារ្យទាំងនេះ ក្នុងអំឡុងពេលដែលមិននឹកស្មានដល់នេះ។
កងទ័ពអាមេរិកបាននិយាយថា ប្រតិបត្តិការស្វែងរករួមគ្នាជាមួយបុគ្គលិកលីទុយអានីកំពុងបន្ត ហើយបានបន្ថែមថា NATO ក៏បានរួមចំណែកជាទ្រព្យសម្បត្តិដល់កិច្ចខិតខំប្រឹងប្រែងនេះផងដែរ។
សេចក្តីថ្លែងការណ៍មួយបាននិយាយថា កងទ័ពសហរដ្ឋអាមេរិក និងអាជ្ញាធរលីទុយអានី កំពុងស៊ើបអង្កេតមូលហេតុនៃគ្រោះថ្នាក់បណ្តាលឲ្យទាហានអាមេរិកស្លាប់នេះ។
អ្នកនាំពាក្យក្រសួងការបរទេសសហរដ្ឋអាមេរិកលោក Tammy Bruce បានប្រាប់សន្និសីទសារព័ត៌មានដោយសម្តែងការសោកសៅចំពោះ ព័ត៌មាននៃសោកនាដកម្មនេះ។ លោកថា យើងផ្តល់ការអាណិតអាសូរយ៉ាងជ្រាលជ្រៅបំផុតរបស់យើងចំពោះទាហាន ក្រុមគ្រួសារ មិត្តភក្តិ និងកងពលរថពាសដែកទី ១។
លោក Bruce បានបន្ថែមថា យើងអរគុណចំពោះកិច្ចខិតខំប្រឹងប្រែងវិសាមញ្ញដែលធ្វើឡើងដោយកងទ័ពសហរដ្ឋអាមេរិក កងកម្លាំងប្រដាប់អាវុធលីទុយអានី និងភ្នាក់ងារស៊ីវិលក្នុងរយៈពេលប្រាំមួយថ្ងៃកន្លងមកនេះ។
សូមជម្រាបថា កងកម្លាំងអាមេរិកតែងតែចូលរួមក្នុងសមយុទ្ធរួមគ្នាជាមួយសម្ព័ន្ធមិត្តណាតូក្នុងប្រទេសលីទុយអានី៕
ដោយ៖ ពេជ្រ
