មេដឹកនាំកូរ៉េខាងជើង លោក គីម ជុងអ៊ុន បានសម្តែងនូវការគាំទ្រឥតងាករេចំពោះសង្គ្រាមរបស់រុស្ស៊ី នៅអ៊ុយក្រែន ក្នុងអំឡុងពេលជួបជាមួយមន្ត្រីសន្តិសុខរុស្ស៊ីកំពូល នៅទីក្រុងព្យុងយ៉ាង។ ប្រព័ន្ធផ្សព្វផ្សាយរដ្ឋកូរ៉េខាងជើង បាននិយាយកាលពីថ្ងៃសៅរ៍ថា ។
ជំនួបកាលពីថ្ងៃសុក្រ រវាងលោក គីម និងលោក Sergei Shoigu លេខាធិការក្រុមប្រឹក្សាសន្តិសុខរុស្ស៊ី បានតាមដានការវាយតម្លៃចារកម្មកូរ៉េខាងត្បូង កាលពីចុងខែកុម្ភៈថា កូរ៉េខាងជើង ទំនងជាបញ្ជូនកងទ័ពបន្ថែមទៅរុស្ស៊ី ហើយទទួលរងនូវការខូចខាតយ៉ាងធ្ងន់ធ្ងរក្នុងសង្គ្រាម។
អ៊ុយក្រែន និងរុស្ស៊ី បានព្រមព្រៀងគ្នាជាគោលការណ៍ កាលពីថ្ងៃពុធ ចំពោះបទឈប់បាញ់ បន្ទាប់ពីប្រធានាធិបតីអាមេរិកលោក ដូណាល់ ត្រាំ ពិភាក្សាជាមួយមេដឹកនាំប្រទេសទាំងពីរ ។
ប្រព័ន្ធផ្សព្វផ្សាយរដ្ឋរបស់កូរ៉េខាងជើង និងរុស្ស៊ី រាយការណ៍ថា លោក គីម និងលោក Shoigu បានពិភាក្សាគ្នាអំពីបញ្ហាជាច្រើន រួមទាំងសង្គ្រាមរបស់រុស្ស៊ីនៅអ៊ុយក្រែន ការសន្ទនារបស់ទីក្រុងម៉ូស្គូជាមួយរដ្ឋបាល លោក Trump និងស្ថានភាពសន្តិសុខនៅឧបទ្វីបកូរ៉េ។
ទន្ទឹមនោះ លោក គីម និងលោក Shoigu ក៏អះអាងសារជាថ្មីអំពីឆន្ទៈរបស់មេដឹកនាំប្រទេសទាំងពីរក្នុងការរក្សាដោយគ្មានលក្ខខណ្ឌនូវសន្ធិសញ្ញាការពារទៅវិញទៅមកដ៏សំខាន់មួយដែលឈានដល់ក្នុងកិច្ចប្រជុំកំពូលកាលពីឆ្នាំមុនក្នុងទីក្រុងព្យុងយ៉ាង ដែលសន្យាផ្តល់ជំនួយទៅវិញទៅមក ប្រសិនបើប្រទេសទាំងពីរប្រឈមមុខនឹងការឈ្លានពាន ។
ក្នុងអំឡុងពេលនៃកិច្ចប្រជុំនេះ លោក គីម ក៏បានកត់សម្គាល់ថា រដ្ឋាភិបាលរបស់លោកនឹងគាំទ្ររុស្ស៊ីជាអថេរ ក្នុងការតស៊ូការពារអធិបតេយ្យភាពជាតិ បូរណភាពទឹកដី និងផលប្រយោជន៍សន្តិសុខ ។
គួរបញ្ជាក់ថា រុស្ស៊ី និងកូរ៉េខាងជើង បានប្រកាសពីទំនាក់ទំនងយ៉ាងស៊ីជម្រៅមួយលើគ្រប់វិស័យ បន្ទាប់ពីជម្លោះនៅអ៊ុយក្រែន ផ្ទុះឡើងមក ៕
ដោយ៖ ពេជ្រ
