មន្ត្រីសេដ្ឋកិច្ចកំពូលរបស់អាមេរិក និងចិនបានជួបពិភាក្សាគ្នាជាលើកដំបូងចាប់តាំងពីលោក Donald Trump ត្រឡប់មកកាន់សេតវិមាន។ ពួកគេទាំងពីរបានសម្តែងនូវ ការព្រួយបារម្ភយ៉ាងខ្លាំងអំពីបញ្ហាផ្សេងៗសំខាន់សេដ្ឋកិច្ច។
រដ្ឋមន្ត្រីក្រសួងរតនាគារសហរដ្ឋអាមេរិកលោក Scott Bessent បាននិយាយតាមអ៊ីនធឺណិតជាមួយឧបនាយករដ្ឋមន្ត្រីចិន He Lifeng ដែលមើលការខុសត្រូវលើគោលនយោបាយសេដ្ឋកិច្ចកាលពីថ្ងៃសុក្រម្សិលមិញ។
នាយកដ្ឋានរតនាគារបានចេញសេចក្តីថ្លែងការណ៍មួយដោយនិយាយថា លោក Bessent បានសម្តែងការព្រួយបារម្ភអំពីអ្វីដែលលោកហៅថា “អតុល្យភាព” និងគោលនយោបាយសេដ្ឋកិច្ច និងពាណិជ្ជកម្មដ៏ “អយុត្តិធម៌”។ លោកបានបន្ថែមសង្កត់ធ្ងន់លើការប្តេជ្ញាចិត្តរបស់រដ្ឋបាល Trump ក្នុងការការពារកម្មករអាមេរិក និងសន្តិសុខជាតិ។
អាមេរិកបានចោទចិនថាជាប្រភពចម្បងនៃសារធាតុគីមីដែលគេប្រើសម្រាប់ផលិតសារធាតុ Fentanyl។ សេចក្តីថ្លែងការណ៍បាននិយាយថាលោក Bessent ក៏បាបង្ហាញពីការព្រួយបារម្ភផងដែរអំពីកិច្ចខិតខំប្រឹងប្រែងប្រឆាំងគ្រឿងញៀនរបស់ប្រទេសចិន។
ប្រព័ន្ធផ្សព្វផ្សាយរដ្ឋចិនបាននិយាយថា លោកបានសម្តែងការព្រួយបារម្ភរបស់លោកផ្ទាល់។ ពួកគេបានពិភាក្សាដោយរួមបញ្ចូលពន្ធបន្ថែមដែលដាក់ដោយ Trump និងវិធានការរឹតបន្តឹងផ្សេងទៀត។
ទោះជាយ៉ាងណាក៏ដោយ ភាគីទាំងពីរបាននិយាយថា ពួកគេទទួលស្គាល់សារៈសំខាន់នៃទំនាក់ទំនងសេដ្ឋកិច្ច និងពាណិជ្ជកម្ម ហើយពួកគេបានយល់ព្រមលើតម្រូវការដើម្បីបន្តការសន្ទនា។
ប្រធានាធិបតីអាមេរិកលោក Donald Trump បានដំឡើងពន្ធបន្ថែម 10 ភាគរយលើការនាំចូលរបស់ចិនទាំងអស់នៅថ្ងៃទី 4 ខែកុម្ភៈ។ ទីក្រុងប៉េកាំងបានសងសឹកនៅថ្ងៃទី 10 ខែកុម្ភៈដោយការដំឡើងពន្ធលើការនាំចូលមួយចំនួនរបស់សហរដ្ឋអាមេរិក៕
ដោយ៖ ពេជ្រ
