ទីប្រឹក្សាសន្តិសុខជាតិរបស់សេតវិមាន លោក Mike Waltz បាននិយាយថា ប្រធានាធិបតី លោក Volodymyr Zelensky អាចនឹងមានកៅអីក្នុងតុចរចា ហើយចាំបាច់ត្រូវធ្វើកិច្ចព្រមព្រៀងមួយស្តីពីការអនុញ្ញាតឲ្យមានការចូលប្រើប្រាស់រ៉ែសំខាន់ៗរបស់អ៊ុយក្រែន។
កាលពីថ្ងៃពុធ លោក Zelensky បានច្រានចោលការទាមទាររបស់សហរដ្ឋអាមេរិក ពាក់ព័ន្ធនឹងធនធានរ៉ែកម្ររបស់ខ្លួននេះ ដែលជាកិច្ចព្រមព្រៀងលោក Trump ស្នើឡើង ដើម្បីជាថ្នូរនឹងការបន្តផ្ដល់ជំនួយដល់ប្រទេសនេះ ក្នុងអំឡុងពេលសង្គ្រាមជាមួយរុស្ស៊ី។
ការអត្ថាធិប្បាយខាងលើនេះ ធ្វើឡើងក្នុងសន្និសីទសារព័ត៌មាននៅសេតវិមាន កាលពីថ្ងៃព្រហស្បតិ៍ សម្រាប់ជំនួបក្នុងទីក្រុងគៀវរវាងលោក Zelensky និងលោក Keith Kellogg ប្រធានបេសកជនអាមេរិកប្រចាំប្រទេសអ៊ុយក្រែន។
លោក Waltz បានលើកឡើងថា សេតវិមាន មានការខកចិត្តយ៉ាងខ្លាំងជាមួយ លោក Zelensky ក្រោយការបដិសេធមិនទទួលយក ស្របតាមសំណើប្រធានាធិបតីអាមេរិក លោក Donald Trump កាលពីដើមសប្តាហ៍នេះ ជុំវិញធនធានកម្រ។
គួរបញ្ជាក់ថា លោក Trump ធ្លាប់ប្រកាសថាបើ លោក Zelensky ចង់ឲ្យអាមេរិក បន្តជំនួយនោះ ត្រូវតែយកធនធានរ៉ែកម្រមកដោះដូរ៕
ដោយ៖ ពេជ្រ
