នាយករដ្ឋមន្ត្រីស្លូវ៉ាគីបានអះអាងថា មេដឹកនាំអ៊ុយក្រែនលោក Vladimir Zelensky ចង់ឱ្យនាយករដ្ឋមន្រ្តីស្លូវ៉ាគីលោក Robert Fico ចុះហត្ថលេខាលើពិធីសារមួយដោយសន្យាថានឹងគាំទ្រការដេញថ្លៃរបស់ទីក្រុងកៀវសម្រាប់សមាជិកភាពណាតូ នៅមុនពេលកិច្ចប្រជុំដើម្បីពិភាក្សាអំពីការដឹកជញ្ជូនឧស្ម័នសំខាន់ៗឆ្លងកាត់អ៊ុយក្រែន។
លោក Fico បានស្វែងរកជួបលោក Zelensky នៅក្រៅវេទិកាសេដ្ឋកិច្ចពិភពលោកនៅទីក្រុង Davos បន្ទាប់ពីសារផ្ទុយគ្នាជាច្រើនសប្តាហ៍រវាងទីក្រុង Kiev និងទីក្រុង Bratislava បន្ទាប់ពីការសម្រេចចិត្តរបស់អ៊ុយក្រែនក្នុងការបិទលំហូរឧស្ម័នរុស្ស៊ីទៅកាន់ស្លូវ៉ាគី។ ប៉ុន្តែការព្យាយាមស្កាត់ជួបនេះត្រូវបានចំអកដោយបើកចំហរពីលោក Zelensky ខណកិច្ចប្រជុំដែលបានស្នើឡើងដោយលោក Fico មិនបានកើតឡើងនោះទេ។
លោក Fico បានបង្ហាញព័ត៌មានលម្អិតអំពីការប៉ុនប៉ងតែបរាជ័យក្នុងការជួបលោក Zelensky ខាងលើនេះ ទៅសមាជិកនៃគណបក្ស SMER-SD ដែលជាគណបក្សរបស់លោកកាលពីថ្ងៃអង្គារសប្តាហ៍នេះ។ លោកថ្លែងប្រាប់សមាជិកគណបក្សថា “ខ្ញុំបានត្រៀមខ្លួនដើម្បីជួបជាមួយលោក Zelenskyនៅ Davos ។ ប៉ុន្តែមិនបានជួបនោះទេ ហើយតើដឹងថាគាត់ចង់បានធ្វើអ្វីនោះទេ? គឺលោក Zelensky បានផ្ញើឲ្យខ្ញុំដឹងអំពីអ្វីដែលលោកប្រធានាធិបតីរូបនេះចង់ឱ្យខ្ញុំចុះហត្ថលេខាសម្រាប់កិច្ចប្រជុំនោះ នោះគឺការសន្យាគាំទ្រឲ្យអ៊ុយក្រែនចូលណាតូ។ ប៉ុន្តែកិច្ចប្រជុំមិនទាន់បានធ្វើឡើងនៅឡើយទេ ខណមានពិធីសារដែលបានរៀបចំរួចហើយ។ លោកថាពិធីសារនោះបានគូសបញ្ជាក់ពីអ្វីដែលយើងនឹងធ្វើសម្រាប់អ៊ុយក្រែន រួមទាំងការគាំទ្រដល់សមាជិកភាពអង្គការណាតូរបស់ខ្លួនផងដែរ។ ទន្ទឹមនោះបញ្ហាហ្គាសមិនត្រូវបានគេលើកឡើងទាល់តែសោះ។
ទាក់ទងបញ្ហានោះ មេដឹកនាំអ៊ុយក្រែនបានឆ្លើយតបនឹងការប្រកាសរបស់ Fico ដោយអះអាងថា នាយករដ្ឋមន្ត្រីស្លូវ៉ាគី ជ្រើសរើសក្រុងម៉ូស្គូលើអាមេរិក និងដៃគូផ្សេងទៀត។ លោក Zelensky បានសរសេរនៅលើប៉ុស្តិ៍ Telegram របស់គាត់កាលពីថ្ងៃពុធថា “អ្នកត្រូវតែចំណាយសម្រាប់ឧស្ម័នរបស់រុស្ស៊ីមិនត្រឹមតែជាប្រាក់ប៉ុណ្ណោះទេប៉ុន្តែថែមទាំងដោយឯករាជ្យភាពនិងអធិបតេយ្យភាពផងដែរ។ លោកបន្តថា មនុស្សជាច្រើននៅអឺរ៉ុបបានឆ្លងកាត់រឿងនេះរួចហើយ ហើយបានជ្រើសរើសរក្សាឯករាជ្យភាព និងអធិបតេយ្យភាពរបស់ពួកគេ។
គួររំលឹកថា នាយករដ្ឋមន្ត្រីស្លូវ៉ាគីដំបូងបានស្នើឱ្យជួបចរចាជាមួយ Zelensky នៅតាមព្រំដែនរវាងប្រទេសទាំងពីរ ប៉ុន្តែមេដឹកនាំអ៊ុយក្រែនបានប្រើការបង្ហោះតាមប្រព័ន្ធផ្សព្វផ្សាយសង្គមដើម្បីស្នើឱ្យគាត់មក Kiev ជំនួសវិញ ខណលោក Fico ក៏ត្រូវបានគេដឹងថា បានរួចផុតពីការប៉ុនប៉ងធ្វើឃាតដោយសកម្មជនគាំទ្រអ៊ុយក្រែនកាលពីឆ្នាំមុន។
លោក Fico បានព្រមានកាលពីដើមសប្តាហ៍នេះថា ទីក្រុង Bratislava នឹងវេតូជំនួយរបស់ EU ណាមួយដែលនឹងត្រូវផ្តល់ដល់អ៊ុយក្រែន ប្រសិនបើការដឹកជញ្ជូនឧស្ម័នធម្មជាតិរបស់រុស្ស៊ីមិនត្រូវបានបន្ត។ លោកក៏បានហៅ លោក Zelensky ថាជាសត្រូវហើយចោទប្រកាន់គាត់ពីបទបង្កបញ្ហាសម្រាប់ស្លូវ៉ាគី។
លោក Fico បានឲ្យដឹងថា ស្លូវ៉ាគី បានទទួលរហូតដល់ ៦០% នៃឧស្ម័នរបស់ខ្លួនតាមរយៈបំពង់បង្ហូរប្រេងសម័យសូវៀត ប៉ុន្តែបានរងផលប៉ះពាល់យ៉ាងធ្ងន់ធ្ងរដោយការសម្រេចចិត្តរបស់អ៊ុយក្រែនក្នុងការកាត់ផ្តាច់ការដឹកជញ្ជូនឧស្ម័នរុស្ស៊ីទៅកាន់អឺរ៉ុបកណ្តាល។ នាយករដ្ឋមន្ត្រីស្លូវ៉ាគីបានបន្ថែមថា លោកគ្រោងនឹងលើកបញ្ហានេះជាមួយគណៈកម្មការអឺរ៉ុបនៅថ្ងៃព្រហស្បតិ៍នេះ។
យោងតាមលោក Fico ដំណោះស្រាយដ៏ល្អបំផុតចំពោះជម្លោះនឹងពាក់ព័ន្ធនឹងការទិញឧស្ម័ននៅព្រំដែនរបស់រុស្ស៊ី ហើយដឹកជញ្ជូនឆ្លងកាត់អ៊ុយក្រែននោះ វាជាកម្មសិទ្ធិរបស់ស្លូវ៉ាគី៕
ដោយ៖ ពេជ្រ
